امریکا میں اب روز مرہ کا سفر صرف بس اور ٹیکسی تک محدود نہیں بلکہ امریکی باسی ہیلی کاپٹر میں بھی اپنی منزل تک کا سفر کرسکیں گے۔

امریکا میں آن لائن ٹیکسی سروس کی جانب سے ہیلی کاپٹر سروس کا آغاز کر دیا گیا ہے جس کو ’اوبر کاپٹر‘ کا نام دیا گیا ہے۔

غیر ملکی  خبر رساں ادارے کے مطا بق  بین الاقوامی آن لائن ٹیکسی سروس کی جانب سے ایک ٹوئٹ میں اعلان کیا گیا ہے کہ اوبر کاپٹر اب اپنے سب ہی مسافروں کے لیے دستیاب ہوگا، اب نیویارک کے افراد منہاٹن سے جون ایف کینیڈی انٹرنیشنل ایئر پورٹ تک اوبر کاپٹر میں سفر کر سکیں گے۔

اعلامیے کے مطابق اوبر ہیلی کاپٹر سروس بھی اب عام عوام کے لیے شروع کی گئی ہے، نیویارک کے شہر ی اب منہاٹن سے  جون  ایف کینیڈی انٹرنیشنل ایئر پورٹ تک 8 منٹ میں اوبر کاپٹر کے ذریعے سفر طے کریں گے۔

اِس آن لائن ہیلی کاپٹر میں بیک وقت 6 مسافر سمیت 2 پائلٹ سفر کرسکیں گے، اوبر کاپٹر رائیڈ کا ہر مسافر کے لیے 200 سے 225 ڈالر کرایا مختص کیا گیا ہے۔

کرائے کی قیمتیں اوبر کاپٹر کی مانگ کے مطابق زیادہ یا کم ہو سکتی ہیں جبکہ یہ سہولت پیر تا جمعہ میسر ہوگی۔

جبکہ  اِس سروس کو ابھی صرف آئی فون صارفین استعمال کر سکتے ہیں جبکہ فلائٹ کی  بکنگ ایئر پورٹ سے کی جائے گی نیز مسافروں کو 5 دن پہلے اپنی سیٹ بُک کروانی ہوگی۔

دوسری جانب بین الاقوامی آن لائن ٹیکسی سروس کے مالکان کا کہنا ہے کہ ان  کا مقصد مستقبل میں گنجان آباد شہری مسافروں کو کم وقت میں فضائی سروس کے ذریعے ایک منزل سے دوسری منزل تک پہنچانا ہے، جس کو اوبر نے فیوچر اربن مو بیلیٹی کا نام دیا ہے۔