اسمارٹ فون بنانےوالی چینی کمپنی’ہواوے‘نےر واں برس امریکی حکومت کی جانب سےپابندیاں عائد کرنےکے باوجودایپل کوپیچھےچھوڑدیاہے۔

موبائل فون کمپنیوں کی فروخت پرنظررکھنےوالی عالمی کمپنی کی ایک تازہ رپورٹ کےمطابق پابندیوں کےباوجود ’ہواوے‘نےدنیاکی معتبرترین فون سازکمپنی ’ایپل‘ کوپیچھےچھوڑدیاہے۔

 ہواوےسال 2019 کےتیسرےحصےمیں بھی فونزکی فروخت میں ’ایپل‘ سےآگےرہی اوراس نےدنیابھر میں 6 کروڑ 60 لاکھ 20 ہزار فون فروخت کرکے دوسرا نمبر حاصل کرلیا۔

فون کمپنیوں کی فروخت پر نظر رکھنے والے ادارے کی رپورٹ  کے مطابق  جنوبی کوریا کی کمپنی ’سام سنگ‘ ایک بار پھر موبائل فونز کی فروخت میں پہلے نمبر پر رہی۔

سام سنگ نے 2019 کی تیسری سہ ماہی میں دنیا بھر میں اپنی 8 کروڑ 80 لاکھ 20 ہزار فونز فروخت کیے، اسی دورانیے کے دوران امریکی کمپنی ایپل نے 4 کروڑ 40 لاکھ 60 ہزار فونز فروخت کیے۔

رپورٹ میں بتایا گیا کہ سال 2019 کی تیسری سہ ماہی میں دنیا بھر میں فروخت ہونے والے موبائلز میں 21 فیصد موبائلز سام سنگ، 18 فیصد ہواوے اور 12 فیصد ایپل کے فونز تھے۔

ایپل کے بعد چوتھے نمبر پر ’اوپو‘ پانچویں نمبر پر ’شیاؤمے‘ رہی۔

 رپورٹ میں  مزیدبتایا گیا کہ سال 2019 کی تیسری سہ ماہی میں مجموعی طور پر 38 کروڑ موبائل فونز فروخت ہوئے جن میں سے 5 کروڑ کے قریب فونز ایسے تھے جنہیں بھارت میں تیار کیا گیا تھا۔

رپورٹ میں ’اوپو، شیاؤمے، اور ریئل می کو ابھرتی ہوئی کمپنیاں قرار دیا گیا ہے اور عندیہ دیا گیا ہے کہ آنے والے وقت میں مذکورہ کمپنیاں بڑی کمپنیوں کو ٹف ٹائم دے سکیں گی۔

 واضح  رہے کہ  امریکا اور گوگل نے ہواوے پر عائد کی گئی پابندیوں کو نرم کردیا تھا اور ہواوے نے بھی گوگل کے ٹکر کا اپنا آپریٹنگ سسٹم متعارف کرایا تھا۔تاہم ابتدائی طور پر پابندیاں لگنے کی وجہ سے ہواوے کو کافی نقصان اٹھانا پڑا تھا اور خیال کیا جا رہا تھا کہ چینی کمپنی انتہائی خسارے میں چلی جائے گی۔