جی ڈی اے کی رہنما نصرت سحر عباسی نے کہا ہے کہ ناصر شاہ علی بابا چالیس چوروں کی صف اوّل کے کھلاڑی ہیں۔
گرینڈ ڈیموکریٹک الائنس (جی ڈی اے) کی رکن سندھ اسمبلی نصرت سحر عباسی نے صوبائی وزیر بلدیات ناصر حسین شاہ کے بیان پر رد عمل دیتے ہوئے کہا کہ جی ڈی اے اور اپوزیشن کی دیگر جماعتوں کے تاریخی احتجاج نے ناصر شاہ جیسے بوگوں کی نیندیں حرام کردی ہیں۔
انہوں نے کہا شاہ صاحب ابھی تو پارٹی شروع ہوئی ہے، ناصر شاہ جی ڈی اے پر تنقید سے قبل اپنے ماضی پر نظر ضرور ڈالیں۔
نصرت سحر عباسی نے کہا شاید وہ اپنا داغدار ماضی بھول چکے ہیں، ناصر شاہ علی بابا چالیس چوروں کی صف اوّل کے کھلاڑی ہیں۔
جی ڈی اے رہنما نے کہا کہ ناصر شاہ یاد رکھیں زبان درازی کا جواب ہم بھی پیار سے دینے کے قائل نہیں ہیں، سندھ کی تباہی میں موصوف برابر کے شریک ہیں۔
نصرت سحر عباسی نے کہا کہ وزیر بلدیات نے اپنے کرتوتوں سے پورے سندھ کو کچرے کا ڈھیر بنانے میں کوئی کسر نہیں چھوڑی، وفاق سے ہزاروں ارب روپے ملنے کے باوجود سندھ کے باسیوں کو صرف تسلی دی جارہی ہے۔
ان کا کہنا تھا کہ سندھ کے غیور عوام اب آپکے ہتھکنڈوں کا شکار نہیں ہونگے، جی ڈی اے پیر صاحب پگارا کی سربراہی میں سندھ کے عوام کی نمائندہ اتحاد ہے۔
یاد رہے پاکستان پیپلزپارٹی سندھ کے ڈپٹی سیکریٹری جنرل اور سندھ کے وزیر بلدیات سید ناصر حسین شاہ نے کہا ہے کہ گرینڈ ڈیموکریٹک الائنس وفاق میں پی ٹی آئی کا اتحادی اور عمران خان کی معاشی تباہی کا شریک جرم ہے۔
انہوں نے کہا کہ سندھ کے بلدیاتی نظام پر تنقید کرنے والوں کے پاس تعمیری سوچ نہیں، اگر کوئی متبادل نظام ہے تو سامنے لائیں ، افسوس کی بات ہے کہ سندھ میں ملک کے سب سے بہتر بلدیاتی نظام کو صرف سیاسی تعصب کا نشانہ بنایا جارہا ہے۔
ناصر حسین شاہ نے کہا ہے کہ پی ٹی آئی اور ایم کیوایم کا ناکام احتجاج اس بات کا ثبوت ہے کہ عوام بلاول بھٹو کے ساتھ ہیں ، اہلیان سندھ جی ڈی اے کے وڈیروں اور جاگیرداروں کے خلاف پاکستان پیپلزپارٹی کے ساتھ ہیں۔
وزیر بلدیات سندھ نے کہا ہے کہ اہلیان سندھ لسانی سیاست کرنے والے کراچی کے شہری وڈیروں کے خلاف بلاول بھٹو کے ساتھ ہیں ، جی ڈی اے کے سیاست دان وفاقی حکومت کا حصہ ہیں، بتائیں سندھ کو پانی کا حصہ کیوں نہیں ملا؟
انہوں نے کہا کہ جی ڈی اے اتحاد وفاقی حکومت کا حصہ ہے اور وفاق کی جانب سے سندھ کے فنڈز روکے جانے کا مکمل ذمہ دار ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News