امریکی صدارتی انتخابات میں صرف دو دن رہ گئے، محاذ پوری طرح گرم ہے، ڈیموکریٹ کملا ہیرس اور ری پبلیکن ڈونلڈ ٹرمپ نے اہم ریاستوں کا رخ کرلیا ہے۔

انتخابی مہم انتہا پر پہنچ گئی ہے، اٹلانٹا جارجیا میں کملا ہیرس نے شاندار ریلی نکالی جس میں خواتین کی بڑی تعداد شریک ہوئی اور کہا کہ کملا ہیرس ہی عورتوں کے حقوق کا تحفظ کرسکتی ہیں۔

اس موقع پر کملا ہیرس کا کہنا تھا کہ حامی ووٹرز ڈونلڈ ٹرمپ کی دہائی کا باب بند کرنے کا وقت آگیا ہے جس میں ہمیں تقسیم اور خوفزدہ کرنے کی کوشش کی گئی۔

دوسری جانب ڈونلڈ ٹرمپ نے گیسٹونیا شمالی کیرولائنا کا رخ کیا اور حامیوں سے خطاب میں امیگریشن اور بارڈر سیکیورٹی کو موضوع بنایا اور خبردار کیا کہ اگر منتخب ہوئے تو لاکھوں تارکین وطن کو بے دخل کردیں۔

موریس ٹاؤن ایریزونا میں ٹرمپ کے حامیوں نے ریلی نکالی اور کہا کہ ٹرمپ ہی دوبارہ امریکہ کے معاملات درست کریں گے۔

اس کے علاوہ ملواکی وسکونسن میں کملا ہیرس نے ٹرمپ کی صنعتی پالیسیوں پر کڑی تنقید کی جبکہ وائت ہاؤس کے سامنے  خواتین کا بہت بڑا اجتماع ہوا، خواتین نے ڈرم بجاتے ہوئے مارچ کیا اور ٹرمپ کے خلاف نعرے بلند کیے۔

سیلم ورجینیا میں ٹرمپ نے ریلی میں شرکت کی اور کہا کہ وہ ہی وہ امیدوار ہیں جو امریکہ کی معیشت کو بچا سکتے ہیں، روزگار کے مواقع پیدا کرسکتے ہیں۔

ری پبلیکن ڈونلڈ ٹرمپ نے اسٹیج پر ڈانس کیا اور کہا کہ ہم ہی امریکہ کو پھر عظیم بنائیں گے۔