محکمہ صحت کی جانب سے جاری بیان کے مطابق کراچی میں ممکنہ طوفانی بارشوں کے پیش نظر اسپتالوں میں جمعہ تا پیر ایمرجنسی نافذ کردی گئی ہے اور عملے کی چھٹیاں منسوخ کردی گئیں ہیں۔

تفصیلات کے مطابق شہر میں ممکنہ طوفانی بارشوں کے خدشہ کے پیش نظر محکمہ صحت نے اسپتالوں میں جمعہ سے پیر تک ایمرجنسی نافذ کر دی ہے، محکمہ صحت نے ضلعی سطح پر کنٹرول روم بنانے کی ہدایت کرتے ہوئے اسپتالوں کو زیادہ سے زیادہ ادویات رکھنے کی ہدایت کی ہے۔

واضح رہے کہ محکمہ موسمیات کے مطابق ہوا کا کم دباو ٔمغرب کی جانب جاسکتا ہے، 8اگست تک ہوا کا کم دباو ٔ راجھستان پہنچنے کا امکان ہے، یہ کم دباو ٔسندھ سمیت کراچی میں 9 سے 11اگست کے دوران بڑے پیمانے پر تیز بارش کا باعث بنے سکتا ہے۔

9 اگست کی شام یا رات سندھ میں بارش متوقع ہے جبکہ کراچی میں 10اور 11 اگست کو تیز بارش ہوسکتی ہے۔

محکمہ موسمیات کے مطابق حالیہ مون سون سسٹم پچھلے سسٹم کے مقابلے میں زیادہ مضبوط ہے،سسٹم کے سندھ داخل ہونے سے تیز ہوائیں بھی چل سکتی ہیں جن کی رفتار 72 کلومیٹر فی گھنٹہ ہوسکتی ہے۔

چیف میٹرولوجسٹ سردارسرفراز کے مطابق خلیج بنگال میں لو پریشرایریا بن رہا ہے، ہوا کا کم دباؤ 8 اگست کو بھارتی ریاست راجستھان پہنچے گا جو بعدازاں سندھ  کے مختلف اضلاع اور کراچی میں پہنچے گا جس کے باعث  9 اور 11 اگست کے درمیان کراچی میں شدید بارشوں کا سلسلہ شروع ہوجائے گا جو پیر 12 اگست تک جاری رہے گا۔

چیف میٹرولوجسٹ کے مطابق کراچی، میرپورخاص، ٹھٹھہ، شہید بے نظیرآباد، حیدرآباد، سکھر اور لاڑکانہ ڈویژن میں موسلادھار بارشوں کا امکان ہے، جب کہ بلوچستان کے اضلاع ژوب،قلات،نصیرآباد،مکران میں بھی بارشیں ہونے کا امکان ہے، تیز بارشوں کی وجہ سے شہر میں نچلے درجے کے سیلاب اور ندی نالوں میں طغیانی کا خدشہ ہے، لہذاٰ متعلقہ ادارے بارش سے نمٹنے کے انتظامات کو ممکن بنائیں۔