کراچی کے مختلف علاقوں میں موسلادھار بارش سے کئی علاقوں میں بتی گل ہو گئی ہے جبکہ شہر میں آج بھی بادل برسنے کی پیش گوئی ہے۔

تفصیلات کے مطا بق محکمہ موسمیات نے کراچی میں آئندہ چوبیس گھنٹوں میں ہلکی بارش کی پیشگوئی کرتے ہوئے کہاہے کہ دوپہر میں بارشں برسانے والا سسٹم غیر فعال ہوگا۔

کراچی میں بارش کی ایک بار پھر انٹری، مختلف علاقوں میں بادل خوب برسے۔ موسم تو سہانا ہو گیا لیکن نشیبی علاقوں میں پانی جمع ہو گیا۔ ٹریفک کی روانی متاثرہوئی۔ بارش کی بوندیں برستے ہی شہر میں بجلی کی فراہمی بھی معطل ہو گئی۔

محکمہ موسمیات کا کہنا ہے ایران کے راستے بلوچستان میں داخل ہونے والا رین سسٹم تاحال موجود ہے لیکن دوپہر میں بارش برسانے والا سسٹم غیر فعال ہوگا، جس کے باعث کراچی میں زیادہ سے زیادہ درجہ حرارت 32 ڈگری سینٹی گریڈ تک پہنچنے کا امکان ہے۔

کورنگی، ڈیفنس، ملیر، ماڈل کالونی، ایئرپورٹ، گلشن اقبال اور دیگر علاقوں میں کے الیکٹر ک کے ناقص سسٹم کے باعث لوگوں کو مشکلات کا سامنا رہا جبکہ محکمہ موسمیات نے آج بھی شہر قائد میں گرج چمک کے ساتھ بارش کی پیشگوئی کی ہے۔

آج دوپہر کے بعد گرج چمک کے ساتھ بارش کا امکان ہے جبکہ حیدرآباد، سکھر،بہاولپور،رحیم یارخان سمیت بلوچستان کےمختلف اضلاع میں بھی بارش متوقع ہے۔

دوسری جانب ملک کے مختلف شہروں میں بارشوں کا اسپیل جاری ہے ، بہاولپور، رحیم یارخان سمیت پنجاب کے مختلف شہروں میں بادل برسنے کا امکان ہے جبکہ بلوچستان کے مختلف اضلاع میں بھی بارشیں ہو سکتی ہیں۔