محکمہ موسمیات نے کہا کہ کراچی کا موسم آج بھی گرم رہے گا۔

محکمہ موسمیات کے مطابق کراچی میں آج سمندری ہواؤں کا راج ہے جبکہ دن بھر موسم شدید گرم رہے گا۔

محکمہ موسمیات نے بتایا کہ شہر قائد کا آج صبح کم سے کم درجہ حرارت 28 ڈگری سینٹی گریڈ ریکارڈ ہوا اور موجودہ درجہ حرارت 30 ڈگری سینٹی گریڈ ہے جبکہ زیادہ سے زیادہ درجہ حرارت 38 ڈگری سینٹی گریڈ رہنے کا امکان ہے۔

اس کے علاوہ شہر میں ہوا میں نمی کا تناسب 77 فیصد ہے جبکہ سندھ کے دیگر اضلاع میں بھی آج موسم شدید گرم اور خشک رہے گا۔

محکمہ موسمیات کے مطابق سکھر، کشمور، دادو، لاڑکانہ اور جیکب آباد میں 17 اور 18 مئی کو گرد آلود ہوائیں چلنے اور ہلکی بارش کا امکان ہے۔

واضح رہے کہ محکمہ موسمیات نے پیشگوئی کی ہے کہ شہر قائد میں آئندہ 10 دنوں تک گرمی کا زور برقرار رہے گا۔

چیف میٹرولوجسٹ سردار سرفراز نے کراچی میں جاری گرمی کے حوالے سے کہا ہے کہ کہ شہر میں آئندہ 10 روز تک موسم گرم رہنے کا امکان ہے اور اس دوران درجہ حرارت 38 ڈگری سینٹی گریڈ تک ریکارڈ کیا جائے گا۔

انکا کہنا تھا کہ شہر میں ہوا میں نمی کا تناسب زیادہ ہونے سے گرمی کی شدت 40 تا 45 ڈگری سینٹی گریڈ تک محسوس کی جائے گی جبکہ اس دوران ہیٹ ویو کا امکان نہیں ہے۔

چیف میٹرولوجسٹ نے بتایا کہ مئی اور جون میں ہمیشہ اسی طرح گرمی ہوتی ہے، تاہم اندرون سندھ میں بھی گرمی کی شدت میں اضافہ متوقع ہے جبکہ 40 تا 45 دادو جیکب آباد و اطراف کا نارمل درجہ حرارت ہے۔

انہوں نے مزید کہا کہ 24 مئی تک ان علاقوں میں گرمی کی شدت میں اضافہ ہوگا جبکہ درجہ حرارت 48 تا 50 ڈگری سینٹی گریڈ ریکارڈ ہونے کا امکان ہے۔