مقبوضہ کشمیرمیں بھارتی فوج کے ہاتھوں شہید ہونے والے نوجوان کشمیری لیڈربرہان وانی کی آج تیسری برسی عقیدت واحترم کے ساتھ منائی جارہی ہے۔ برہان وانی کو آٹھ جولائی 2016 میں بھارتی فوج نے ظالمانہ کارروانی کرکے شہید کردیا تھا۔

تفصیلات کے مطابق برہان وانی کے تیسرے یوم شہادت کے موقع پرلائن آف کنٹرول کے دونوں جانب احتجاجی ریلیوں،مظاہروں اور جلسے جلوسوں کا انعقادکیا گیا ہے۔ شہید برہان وانی کی برسی یوم مزاحمت کے طور پرمنائی جارہی ہے۔

آزاد کشمیر کےدارالحکومت مظفرآباد کےبرہان وانی شہید چوک میں پاسبان حریت کے زیر اہتمام نوجوان شہید لیڈر کی یادگار پر کشمیری نوجوانوں کے اسکواڈ کی سلامی دی گئی۔ اس دوران مقبوضہ کشمیر کی آزادی کے حق میں ریلی نکالی گئی اور آزادی کشمیر کیلئے نعرے بازی کی بھی گئی۔

پاسبان حریت کی جانب سے شہیدبرہان وانی کے یوم شہادت کی تقریب میں پاکستان اور آزادکشمیر کے قومی ترانے بھی بجائے گئے۔ ریلی کے شرکا کا کہناتھا کہ جب تک بھارت کامقبوضہ کشمیرسے ناجائز قبضہ ختم نہیں کیا جاتا کشمیریوں کی مزاحمت جاری رہے گی۔ اس دوران مظاہرین کی جانب سے بھارت کیخلاف شدید نعرے بازی کی گئی۔

دوسری جانب مقبوضہ کشمیر میں حریت رہنماوں کی جانب سےشہید برہان وانی کے یوم شہادت پر ہڑتال کااعلان کیا گیا ہے، بھارتی فوج کےغاضبانہ تسلط کے خلاف اور مقبوضہ کشمیر کی آزادی کیلئے سری نگر سمیت متعدد اضلاع میں مارچ کا اعلان کیا گیا ہے۔ ضلع بڈگام، کلگام اور اسلام آباد سمیت متعدداضلاع سے کشمیری بھارتی مظالم کے خلاف جمع ہوں گے۔

آزادی کے متوالوں کی راہ میں رکاوٹ ڈالنے کیلئے کٹھ پتلی انتظامیہ کی جانب سے مقبوضہ کشمیر میں بزدل بھارتی فوجوں کی نفری بڑھا دی گئی اور مظاہرین کو روکنے کیلئےسری نگر سمیت متعدد اضلاع میں اہم شاہروں کو بند کردیا گیا۔ سری نگر اور اطراف کے اضلاع میں انٹرنیٹ سروس بھی معطل کردی گئی۔