ہانگ کانگ میں پارلیمنٹ ہاوس پرمظاہرین نے دھاوہ بول دیا۔

ہانگ کانگ کو چین کے حوالے کرنےکے خلاف بائیسویں سالگرہ کے موقع پر مظاہرین نے پارلیمنٹ پرقبضہ کرلیا۔ ہانگ کانگ  میں مجرمان کی حوالگی سے متعلق مجوزہ بل کے خلاف احتجاجی مظاہروں کا سلسلہ تین ہفتوں سےجاری ہے۔

بین الااقوامی میڈیا کا کہنا ہے کہ گزشتہ رات مظاہرین پولیس سے جھڑپ کے دوران پارلیمنٹ میں داخل ہوگئےاور توڑ پھوڑکی۔ پارلیمنٹ کی دیواروں پرحکومت مخالف نعرے بھی لکھے۔ مظاہرین نےپارلیمنٹ میں برطانوی جھنڈابھی لہرایا۔

پولیس نےمظاہرین کاپارلیمنٹ سے قبضہ ہٹانے کیلئےکارروائی کرتے ہوئے عمارت کوچاروں جانب سے گھیرے میں لے لیا۔ پولیس نے مظاہرین کومنتشر کرنے کیلئے آنسو گیس کی شیلنگ کی اور لاٹھی چارج بھی کیا۔

 اس سے قبل مظاہرین نے بیجنگ کے حمایت یافتہ حکمرانوں کے خلاف مظاہرہ کرتے ہوئے ان سے استعفے کا مطالبہ کیا تھا۔

مظاہرین کا یہ بھی کہناتھا کہ ان کےپاس قانون کی خلاف ورزی کے علاوہ کوئی راستہ نہیں۔

واضح رہے کہ ہانگ کانگ میں مجرمان کی حوالگی سے متعلق بل پیش کیاگیاہے جس میں ہانگ کانگ اور چین کے دیگر علاقوں میں کیس کی مناسبت سےمفرور ملزمان کوحوالے کرنے کیلئے معاہدے کی تجویز دی گئی ہے۔

مظاہرین کا کہنا ہے کہ یہ بِل چینی حکومت کی جانب سےہےجو خدشہ ظاہر کرتاہے کہ بیجنگ اس قانون کو سماجی کارکنان، ناقدین اور دیگر سیاسی مخالفین کی چین حوالگی کے لیے استعمال کرے گا۔