بھارتی قید میں موجود حریت رہنما سید علی گیلانی نے ایک بار پھر مسلم امہ کو کشمیریوں کی فوری مدد کرنے کی اپیل کی ہے۔

تفصیلات کے مطابق کشمیریوں کے نام اپنے خط میں سید علی گیلانی نے اپنے علاقوں میں بڑے پیمانے پر مظاہرے اور احتجاج کرنے کی اپیل کی ہے ان کا کہنا تھا کہ بیرون ملک لوگ وادی کے سفیر بنیں، اور بھرپور احتجاج کریں۔ وقت آ گیا ہے بھارت نواز کشمیری بھی ہمارا ساتھ دیں، بھارت کشمیری عوام نہیں، کشمیر کی سرزمین چاہتا ہے۔

نظر بند بزرگ حریت رہنما کا کہنا ہے کہ کشمیری عوام بہادری سے بھارتی مظالم کے خلاف کھڑے ہیں، علی گیلانی نے کہا کہ کشمیر میں مواصلاتی نظام بند ہے، ہزاروں نوجوان گرفتار ہیں، بھارتی فوج مارنے کیلئے تیار ہے اور کشمیری احتجاج کیلئے تیار ہیں۔
علی گیلانی نے اپیل کی کہ مقبوضہ کشمیر سے باہر لوگ کشمیر کے سفیر بنیں احتجاج کریں، ان کا مزید کہنا تھا کہ بھارت کشمیر نہیں بلکہ کشمیر کی سرزمین چاہتا ہے۔

حریت رہنما نے مزید کہا کہ مقبوضہ کشمیر کو دو حصوں میں تقسیم کرنا جمہوریت کے ساتھ مذاق ہے، بھارت کو تاریخ کبھی معاف نہیں کرے گی، تاریخ کی کتاب کا ہر خالی صفحہ چیخ چیخ کر بتائے گا کہ کشمیر میں کتنے مظالم ڈھائے گئے۔

انہوں نے کہا کہ بھارت کی کوشش کے باوجود مسئلہ سلامتی کونسل میں اٹھا ہے، بھارت اپنی فوج بھی لے آئےکشمیر ی اپنے حق کیلئےکوشاں رہیں گے۔