صدرآزاد کشمیر سردار مسعود خان نے کہا ہے کہ بھارت نے مقبوضہ کشمیرکو جیل اور میدان جنگ میں تبدیل کردیا ہے۔

تفصیلات کے مطابق اسلام آباد میں صدرآزاد کشمیر مسعود خان نے پریس کانفرنس کرتے ہوئے کہا ہےکہ مودی حکومت اپنے مکروہ اقدامات سے دنیا کو گمراہ کررہی ہے۔

صدر آزاد کشمیر نے کہا کہ بھارت نے آرٹیکل 370 ختم کرکے غیر قانونی اقدام کیا ہے ، آرٹیکل 370 سے آزاد کشمیر اور پاکستان کا کوئی لینا دینا نہیں ہے ۔

صدر آزاد کشمیر مسعود خان کا یہ بھی کہنا تھا کہ شیخ عبداللہ  نے آرٹیکل  370 کے ذریعے مقبوضہ کشمیر کا بھارت سے الحاق کیاہے۔

مسعود خان نے کہا کہ اب مقبوضہ کشمیر کی بھارت نواز جماعتیں بھی بلبلا اٹھی ہیں،اگرکوئی محدود جنگ ہوئی تو وہ غیر محدود نیوکلیئروینچر ہوگی اور تابکاری اثرات سے ڈھائی ارب لوگ متاثر ہوں گے۔

صدر آزاد کشمیر مسعود خان نے یہ بھی کہا کہ مقبوضہ کشمیر میں نسل کشی کا آغاز ہوچکا ہے ، بھارت نے کشمیریوں کی جائیدادوں پر قبضے  بھی کر لیے ہیں۔

صدر آزاد کشمیر کا کہنا تھا کہ جموں کشمیر میں بچے بلک بلک کر جانیں دے رہے ہیں، قحط کی صورتحال پر مغربی ممالک خاموش ہیں۔

پریس کانفرنس میں صدر آزاد کشمیر کایہ بھی کہنا تھا کہ جموں کشمیر کے سیاسی جہد پر صرف سلامتی کونسل کے پاس اختیار ہے۔

مسعود خان نے کہا کہ نہتےعوام پر بھارتی فوجی حملہ آور ہوئے،6 ہزار سے زائد کشمیری گرفتار کرکے قید میں ڈال دیئے گئے، آنسو گیس، پیلٹ گنوں سےعوام کو زخمی کیا جارہا ہے۔

صدر آزاد کشمیر نے مزید کہا کہ 300 مقامات سے پتھراؤ کے واقعات کی اطلاعات ملی ہیں، مقبوضہ کشمیر میں بچے بلک بلک کر جان دے رہے ہیں جبکہ میر واعظ عمر، آسیہ اندرابی سمیت حریت قیادت قید میں ہے۔