بھارتی صحافی اروندھتی رائے کے مطابق پاکستان نے کبھی اپنے لوگوں کیخلاف فوج استعمال نہیں کی۔

تفصیلات کے مطا بق عالمی شہرت یافتہ بھارتی لکھاری، صحافی و انسانی حقوق کی کارکن اروندھتی رائے کے مطابق سیکولر بھارت اپنے ہی لوگوں کے خلاف کئی سال سے فوج کو بطور ہتھیار استعمال کرتا آ رہا ہے۔

ایک انٹرویو کے دوران انہوں نے کہا کہ پاکستان نے کبھی اپنے لوگوں کے خلاف فوج استعمال نہیں کی مگر بھارت نے مقبوضہ کشمیر، منی پور، ناگا لینڈ، میزورام، تلنگانہ، پنجاب، گوا اور حیدرآباد میں اپنی فوج تعینات کر رکھی ہے۔

اروندھتی رائے نے کہا کہ کشمیر میں مسلمان بستے ہیں، پنجاب میں سکھ مذہب سے تعلق رکھنے والے لوگوں کی تعداد زیادہ ہے، ناگالینڈ اور منی پور میں قبائلی علاقے کے لوگ رہتے ہیں جبکہ میزورام میں عیسائیت مذہب کے پیروکاروں کی تعداد زیادہ ہے،اور انہی تمام علاقوں میں بھارت نے فوج تعینات کی ہوئی ہے۔

ایوارڈ یافتہ لکھاری کا کہنا تھا کہ بھارت 1947 سے لے کر مقبوضہ کشمیر میں مسلمانوں، تلنگانہ میں خصوصی قبائل اور کچھ ریاستوں اور علاقوں میں نچلی ذات کے ہندؤں کے خلاف فوج کو استعمال کرتا آ رہا ہے۔

واضح رہے کہ بھارتی لکھاری و صحافی اروندھتی رائےبھارت میں انسانی حقوق کی خلاف ورزی، ہندو انتہاپسندی، مقبوضہ کشمیر میں انسانیت سوز اقدام اور اقلیتوں کے خلاف ہونے والے مظالم پر آواز بلند کرنے کی وجہ سے دنیا میں شہرت رکھتی ہیں۔