امریکی صدر  ڈونلڈ ٹرمپ  کا کہنا ہے کہ انہیں یقین ہےکہ ایرانی قیادت ان سے بات چیت کرنا چاہتی ہے۔ اس لئے امریکی صدر ٹرمپ نے ایرانی ہم منصب سے ملاقات پر رضا مندی ظاہر کردی ہے۔

وائٹ ہاؤس میں جمعرات کو صحافیوں سے بات کرتے ہوئے صدر ٹرمپ کا کہنا تھا کہ وہ کوشش کر رہے ہیں کہ اقوام متحدہ کی جنرل اسمبلی کے اجلاس کے موقع پر وہ ایرانی ہم منصب کے ہمراہ سمٹ کا انعقاد کریں۔

انہوں نے صحافیوں سے کہا کہ وہ بتانا چاہتے ہیں کہ ‘ایران ملاقات کا خواہاں ہے۔’

صدر ٹرمپ کا بیان ایسے موقع پر سامنے آیا ہے کہ جب ​نیویارک میں رواں ماہ اقوام متحدہ کی جنرل اسمبلی کا اجلاس ہونے جارہا ہے جس میں دنیا بھر کے سربراہان مملکت شرکت کریں گے۔

تاہم دوسری جانب   ایران کی جانب سے اب تک اس حوالے سے مثبت پیشرفت نہیں ہوئی ہے جب کہ گزشتہ روز ایرانی صدر نے ٹرمپ انتظامیہ کو شدید تنقید کا نشانہ بناتے ہوئے کہا تھا کہ امریکیوں کو سمجھنا چاہیے کہ لڑائی اور جنگجوئی ان کے حق میں نہیں ہے لہٰذا یہ ختم ہونا چاہیے۔

صدر ٹرمپ نے حال ہی میں ایران سے متعلق سخت گیر مؤقف رکھنے والے اپنے قومی سلامتی کے مشیر جان بولٹن کو عہدے سے ہٹا دیا تھا۔

جبکہ  گزشتہ ماہ فرانسیسی صدر ایمانوئل میخواں نے جی سیون اجلاس کے موقع پر کہا تھا کہ وہ امریکہ اور ایران کے صدور کے درمیان ملاقات کرانے کی کوشش کر رہے ہیں۔ تاکہ دونوں ملکوں کے درمیان جاری کشیدگی کو کم کیا جاسکے۔

واضح  رہے  کہ امریکی صدر ڈونلڈ ٹرمپ کے ایران کے ساتھ جوہری پروگرام کو محدود کرنے کے معاہدے کو یک طرفہ طور پر منسوخ کرنے کے بعد سے ایران اور امریکا کے درمیان کشیدگی میں اضافہ ہوا جس کے بعد امریکا نے ایرانی وزیر خارجہ جواد ظریف اور ایران کے سپریم لیڈر خامنہ ای پر پابندی عائد کردی تھی۔