سعودی عرب  امریکا کی قیادت میں بحری سرحدوں کے تحفظ کیلئے بننے والے بین الاقوامی اتحاد کا حصہ بن گیا ہے۔

عرب میڈیا کی رپورٹ کے مطابق  سعودی عرب international maritime security alliance یعنیٰ بین الاقوامی اتحاد برائے بحری تحفظ کا حصہ بن گیا ہے۔

امریکا کی قیادت میں بننے والے اس اتحاد کا مقصداتحاد میں شامل ممالک کے جہازوں کے تحفظ اور پانی کے ذریعے آزاد بین الاقوامی تجارت اورسمت شناسی کو  یقینی بنانا ہے۔

سعودی سرکاری نیوز ایجنسی سپا نے اپنی رپورٹ میں وزارت دفاع کا حوالہ دیتے ہوئے بتایا کہ سعودی حکومت کا یہ اقدام بحری سمت شناسی اور عالمی تجارت کو لاحق خطرات کی روک تھام کیلئے اٹھایا گیا ہے۔اس طرح عالمی توانائی کا امن، عالمی معیشت کے لیے توانائی کی مسلسل رسد اور کی رسد جاری رکھنا اور امن کو برقرار رکھنا یقینی بنایا جا سکتا ہے۔جبکہ سمندری گذر گاہوں کو عبور کرنے والے تجارتی جہازوں کے امن و سلامتی کو مضبوطی حاصل ہو گی۔

رپورٹ میں مزید بتایاگیا ہے کہ امریکا کی جانب سے اتحاد بنانے کا اقدام خطے  میں  ایران کی جانب سے تیل بردار جہازوں کو قبضہ میں لینے کے خلاف اٹھایا گیا ہے۔

خلیج میں میری ٹائم سیکورٹی مشن آبنائے ہرمز، آبنائے باب المندب، بحرِ عُمان اور خلیج عربی کے علاقے میں سرگرم ہو گا۔

برطانیہ ،امریکا،آسٹریلیا اور بحرین پہلے سے  ہی اتحاد میں شامل ہیں۔