خلیجی ممالک  کی افواج کے سربراہوں کی ملاقات  کے بعد خلیج تعاون کونسل  (جی سی سی )کا اعلامیہ جاری کردیا گیا ہے۔

جی سی سی کے اعلامیے کے مطابق خلیجی ممالک کی افواج کے سربراہوں نے کہا ہے کہ جی سی سی ممالک کے کسی رکن پر حملہ تمام ممالک پر حملہ تصور ہوگا۔ جی سی سی ممالک کی افواج حملہ آور کے خلاف کسی امتیاز کے بغیر کارروائی کرے گی۔

عرب  میڈیا  نے اپنی رپورٹ میں کہا کہ سعودی دارالحکومت ریاض میں جی سی سی ممالک کے فوجی سربراہوں کی مشترکہ کانفرنس ہوئی  جس میں تیل تنصیبات اور بین الاقوامی سمندر کو محفوظ بنانے پر زوردیا گیا ہے۔سعودی مسلح افواج کی اپیل پر منعقد ہونے والی کانفرنس میں جی سی سی ممالک کے سربراہوں نے خطے کو درپیش خطرات سے نمٹنے پر غوروخوض کیا۔ موجودہ حالات زیر بحث رہے۔

مشترکہ اعلامیہ میں کہا گیا ہے کہ خلیجی ممالک کی افواج ہر وقت مستعد ہے۔خطے کو خطرات میں گھیرنے والی کسی بھی طاقت کا منہ توڑ جواب دیا جائے گا۔خلیجی ممالک کی افواج نے سعودی عرب کی امن وسلامتی کو یقینی بنانے کے لیے سعودی قیادت کی جانب سے کئے جانے والے تمام اقدامات کی حمایت کی۔

اعلامیے کے مطابق جی سی سی ممالک کی افواج کے سربراہوں نے اس بات پر زور دیا کہ خطرات سے نمٹنے کے لیے خلیجی ممالک کو مشترکہ کوششیں کرنی چاہیے۔کسی بھی  خطرے سے نمٹنے کیلئے ہمہ وقت تیار ہیں ۔

اعلامیے میں مزید کہا گیا کہ سربراہان کی ملاقات کے موقع پر اجتماعی امن کو یقینی بنانے کے لیے بھرپور کوششیں کرنے کا اعادہ بھی کیا گیا۔