امریکا سے  جوہری مذاکرات سے قبل شمالی کوریا نے ایک اور بیلسٹک میزائل  کا کامیاب تجربہ  کیا ہے۔

  غیر ملکی  خبر رساں ادارے  کے  مطابق شمالی کوریا نےبدھ کو  اپنے مشرقی ساحل پر کم از کم ایک میزائل فائر کیا جس نے 450 کلومیٹر کا فاصلہ طے کیا اور زمین سے 910 کلومیٹر کی اونچائی تک گیا۔

  جنوبی کوریا کے حکام نے تصدیق کی ہے کہ یہ میزائل آبدوز سے داغا گیا ہے۔جنوبی کوریا کے مطابق میزائل شمالی کوریا کے علاقے وونسان سے فائر کیا گیا ۔

جنوبی کوریا کا کہنا ہے کہ مزید تجربات کے پیش نظر فوج نے صورتحال پر نظر رکھی ہوئی ہے۔

دوسری جانب جاپانی وزیراعظم شنزو آبے نے اس تجربے کی مذمت کرتے ہوئے کہا کہ ایک میزائل جاپان کے خصوصی اقتصادی زون کے پانیوں میں گرا، جو ساحل سے 370 کلومیٹر کے فاصلے پر واقعہ ہے۔

جاپانی وزیر اعظم نےتجربہ کو اقوام متحدہ کی سلامتی کونسل کی قراردادوں کی خلاف ورزی قرار دےدیاہے  ۔

واضح  رہے کہ  اس سے  قبل  بھی  رواں سال جولائی  میں شمالی کوریا نے درمیانی فاصلے پر مار کرنے والے دو میزائل کا  کامیاب   تجربہ  کیا تھا  جو سمندر میں جا کر گرے تھے۔

شمالی کوریا کے مشرقی ساحل وانسان  سے  ایک میزائل چھ سو نوے کلو میٹر کا فاصلہ طے کر کے سمندر میں گرا اور یہ میزائل بظاہر نئے ڈیزائن کے   تھے۔

جبکہ شمالی کوریا نے  رواں سال مئی میں بھی ایک کم فاصلے پر مار کرنے والے میزائل کا تجربہ کیا تھا جو 2017میں بین البراعظمی میزائل کے تجربے کے بعد پہلا ایسا تجربہ تھا۔

واضح  رہے کہ یہ  میزائل تجربہ امریکا سے  جوہری  مذاکرات سے  ایک دن  قبل  کیا گیا ہے  ۔