پاکستان کی طرف فضائی حدود کے استعمال پر پابندی کے بعد بھارتی وزیر اعظم نریندر مودی طویل راستہ اختیار کر کے سعودی عرب پہنچ گئے ہیں۔

بھارتی میڈیا کے مطابق  بھارتی وزیر اعظم کے دورے کے دوران توانائی، ڈیفنس،سول ایوی ایشن اورانسداد دہشت گردی سے متعلق تقریباً ایک درجن معاہدوں پر دستخط  ہوں  گے۔ مودی سعودی عرب کے فرمانروا شاہ سلمان بن عبدالعزیز کی دعوت پر وہاں جا رہے ہیں اور وہ ریاض میں فیچر انویسمنٹ انسٹيٹيوٹ فورم کے تیسرے سیشن میں شامل ہوں گے۔

برطانوی میڈیا کے مطابق مودی کے اس دورے میں غیر ملکی سرمایہ کاری پر مذاکرات متوقع ہیں۔ اس کے علاوہ حج کے لیے جانے والے زائرین کی تعداد بڑھانے کے بارے میں بھی بات ہوگی۔

جہاں وزیر اعظم نریندر مودی انڈین معیشت میں اندرونی سست روی سے نمٹ رہے ہیں وہیں عالمی معیشت میں سست روی کی وجہ سے سعودی عرب کی معیشت بھی مشکل میں ہے۔

ایسے میں دونوں ملکوں کے رہنماؤں کے درمیان ممکنہ طور پر ہونے والے بڑے معاہدوں پر سب کی نظر ہے۔

بھارت اور سعودی عرب کے تعلقات کا جائزہ لیا جائے تو معلوم ہوتا ہے کہ  بھارت کا 17 فیصد تیل اور 32 فیصد ایل پی جی سعودی عرب سے آتا ہے اور دونوں کے درمیان تقریباً 27 اعشاریہ 5 ارب ڈالر کی تجارت ہوتی ہے۔ اس میں 22 ارب ڈالر کی پیٹرولیم مصنوعات انڈیا سعودی عرب سے خریدتا ہے جبکہ  بھارت  کی برامدات صرف 5 اعشاریہ 5 ارب ڈالر مالیت کی ہیں۔

مودی کا سعودی عرب کا یہ دوسرا دورہ ہے ،ا س قبل وہ 2016میں بھی ریاض گئے تھے ۔