سعودی عرب کے وزیر توانائی شہزادہ عبدالعزیز بن سلمان نے کہا ہے کہ  سعودی  مملکت نے گذشتہ ماہ اپنی دو تنصیبات پر ہونے والے حملوں کے بعد تیل کی پیداوار کو مکمل طور پر بحال کرلیا ہے۔

عرب  میڈیا کے مطابق سعودی وزیر توانائی شہزادہ عبدالعزیز بن سلمان نے روسی دارالحکو مت ماسکو میں توانائی کانفرنس سے خطاب میں کہاکہ عودی  مملکت نے گذشتہ ماہ اپنی دو تنصیبات پر ہونے والے حملوں کے بعد تیل کی پیداوار کو مکمل طور پر بحال کرلیا ہے۔

سعودی وزیر نے کہا کہ مملکت میں تیل کی موجودہ پیداواری صلاحیت روزانہ 11.3 ملین بیرل ہے۔

انہوں نے کہا کہ ہم آگے بڑھ کر حملوں کا صفحہ تبدیل کر چکے ہیں۔ ہمارے پاس آرامکو کی عوامی پیش کش اور کمپنی کے شیئرز کی فروخت جیسے نئے چیلینجز ہیں جن پرہم توجہ مرکوز کررہے ہیں۔آرامکو کمپنی نے سنہ2020ء میں اپنے مالکان کو 75 ارب ڈالر کا منافع تقسیم کرنے کا عزم کیا ہے۔

انہوں نے بتایا کہ آرامکو کی حصص اور منافع کی تقسیم کا حجم 2020 ء میں تقسیم کے لیے پیش کیا جا رہا ہے وہ سنہ 2018ء کی نسبت 29 فی صد زیادہ ہے۔

واضح رہے کہ  رواں برس 14 ستمبر کو  سعودی تیل تنصیبات پر ڈرون حملہ کیا گیا تھا۔ تاہم سعودی عرب اور امریکا نے ان حملوں کا ذمہ دار ایران کو ٹھہرایا ہے۔

ان حملوں کے بعد سے علاقے میں سخت کشیدگی ہے اور امریکہ نے خلیج اور سعودی عرب میں اپنے فوجیوں کی تعداد میں اضافہ کیا ہے۔ان الزامات کو ایران کی جانب سے مسترد کیا گیا ہے۔ ایران کا موقف ہے کہ الزامات کو ثابت کیا جائے۔