تھائی لینڈ کے بادشاہ مہا وجیرا لانگ کورن نے اپنی دیرینہ ساتھی کو بے وفا اور بدتمیز قرار دے کر تمام شاہی اعزازات سے محروم کردیا۔

تفصیلات  کے مطابق سوتنوں کی لڑائی مستقبل کی ملکہ کو سڑکوں پر لے آئی۔تھائی لینڈ کے 67 سالہ بادشاہ وجیرا لانگ کورن نے اپنی دیرینہ ساتھی سنینت وانگواجیراپاکدی سے شاہی خاندان سے ’بدتمیزی‘ اور ’بے وفائی‘ کی پاداش میں تمام اعزازت چھین لیے۔انہیں چند ماہ پہلے ہی ’رائل نوبل کنسورٹ‘ کا لقب دیا تھا۔ جو صدی میں پہلی بار کسی بادشاہ نے اپنی ساتھی کو دیا تھا۔

شاہی فرمان کے مطابق سنینت کو ملکہ بننے کا بڑا شوق تھا۔انہوں نے عہدے کا ناجائز فائدہ اٹھاکر بادشاہ کی جانب سے احکامات جاری کئے اور بادشاہ کی چوتھی اہلیہ کے ملکہ بننے میں بھی رکاوٹ ڈالی۔ 34 سالہ سنینت  ونگوا کو تھائی فوج میں میجر جنرل کا عہدہ بھی دیا گیا تھا جہاں انہوں نے نرس کی حیثیت سے خدمات انجام دینا شروع کی تھی اس کے علاوہ وہ ایک تربیت یافتہ پائلٹ بھی ہیں۔

بادشاہ مہا وجیرا لانگ کورن نے رواں برس جولائی میں ملکہ ستھیدا سے اپنی چوتھی شادی کے دو ماہ بعد سنینت  ونگوا جیراپاکڈی کو باضابطہ طور پر رائل نوبل کنسورٹ کا درجہ دیا تھا۔

سنینات وونگوا تھائی بادشاہت کی 100 سالہ تاریخ میں رائل نوبل کنسورٹ کا درجہ پانے والی پہلی خاتون تھیں۔ یاد رہے کہ مہاوجیرالانگ کورن 2016 میں اپنے والد  بھومیبول ادولیاج کے انتقال کے بعد بادشاہ بنے تھے۔تھائی بادشاہ اب تک چار شادیاں کرچکے ہیں اور ان کے  مجموعی طور پر 7 اولادیں ہیں۔