داعش کے سربراہ ابوبکر البغدادی کی ہلاکت کے بعد دولت اسلامیہ کی جانب سے انتقامی کارروائیوں کے امکانات پر فرانس میں سیکیورٹی کو ہائی الرٹ کردیا گیا ہے۔

تفصیلات کے مطابق داعش کے سربراہ ابوبکر البغدادی کی ہلاکت کے بعد انتقامی حملوں کا خطرہ بڑھ گیا ہے ، فرانسیسی وزیر داخلہ کرسٹوفی کاسٹنر نے ملک کے سیکیورٹی اداروں کوچوکنا رہنے کی ہدایت کرتے ہوئے کہا ہے کہ جنگجو گروپ کے سربراہ کی موت کے ردعمل میں ملک میں حملے ہوسکتے ہیں۔

فرانسیسی وزیر داخلہ نے سیکیورٹی اداروں کے ساتھ منعقدہ ایک اجلاس میں کہا کہ ابوبکر البغدادی کی موت کے بعد جہادیوں کے پروپیگنڈے میں شدت آسکتی ہے، اس لیے آیندہ دنوں میں ہونے والی عوامی تقریبات میں زیادہ چوکس ہونے کی ضرورت ہے۔

ایس جی پی پولیس ایف او ٹریڈ یونین کے سکریٹری جنرل، ییوس لیف بویرے نے میڈیا کو بتایا کہ یہ پہلا موقع ہے جب وزارت داخلہ نے ایک اعلٰی پروفائل جہادی رہنما کی ہلاکت کے بعد اس طرح کی کوئی رپورٹ جاری کی ہےجبکہ فرانسیسی صدر ایمانوئل میکرون نے البغدادی کی موت کو ان کی تنظیم کے لیے ایک دھچکا قراردیا ہے۔

یاد رہے امریکی اسپیشل فورسز نے ٹرمپ کی منظوری سے ادلب میں آپریشن کیا، جس کے نتیجے میں ابوبکر البغدادی مارا گیا تھا۔

اس موقع پر امریکی صدر نے میڈیا سے گفتگو کرتے ہوئے البغدادی کی موت کی تصدیق کرتے ہوئے کہا تھا کہ ابوبکر البغدادی شام میں ایک سرنگ میں موجود تھا، آپریشن کے دوران وہ خودکش دھماکے میں مارا گیا۔

امریکی صدر ڈونلڈ ٹرمپ کا کہنا تھا کہ البغدادی کی لاش مسخ ہوچکی ہے، ڈی این اے سے شناخت ہوگئی ہے، ابوبکر البغدادی بیمار ذہنیت کا انسان تھا، اس نے ا خودکش حملے میں اپنے تین بچوں کو بھی مارا ہے۔