برطانوی پولیس نے کاروائی کرتےہوئے شمالی انگلینڈ میں ایک مشکوک ٹرک سے 39  لاشیں برآمد کرلیں ہیں ۔

غیر ملکی خبررساں ادارے کے مطابق برطانیہ میں شمالی انگلینڈ کی کاونٹی ایسیکس کےعلاقے واٹر گلیڈ انڈسٹریل پارک میں ایک ٹرک سے 39 لاشیں برآمد ہوئیں ہیں جنہیں پولیس نے ایمبولینس کے ذریعے اسپتال منتقل کردیا ہے۔

جبکہ  پولیس نے شمالی آئرلینڈ  سے تعلق رکھنے والے  25 سالہ ٹرک ڈرائیور کو قتل کے شبے میں گرفتار کرلیا ہے ۔

پولیس کے مطابق  ٹرک بلغاریہ سے سفر کرتا ہوا برطاینہ میں ہولی ہیڈ کے راستے سے ہفتے کے روز داخل ہوا تھا۔ایسیکس پولیس کا کہنا ہے کہ ٹرک سے برآمد ہونےوالی 38 لاشیں بالغ افراد کی جبکہ ایک نالغ شخص کی لاش ہے۔

پولیس ترجمان اینڈریو مارینا کا کہنا ہے کہ پولیس افسران لاشوں کو شناخت کرنے کی کوشش کررہے ہیں تاہم یہ ایک طویل عمل ہے۔

پولیس ترجمان کامزید  کہنا تھا کہ ہم نے ٹرک ڈرائیور کو درجنوں افراد کے قتل کے شبے میں گرفتار کرلیا ہے جو تاحال پولیس کی حراست میں ہے اور ملزم سے تفتیش جاری ہے ۔

واقعےپر افسوس کااظہارکرتےہوئے مقامی رکن پارلیمنٹ جیکی ڈوئل نے ٹوئٹ کرتے ہوئے کہا کہ ٹرک سے ملنے والی لاشوں کا تعلق اسمگلروں سے ہوسکتا ہے۔ ان کامزید کہنا تھا کہ  لوگوں کی ا سمگلنگ  ایک خطرناک  کاروبار ہے ۔ایسکس پولیس کے لئے یہ ایک بہت بڑی تفتیش  ہے۔ہم امید کرتے ہیں کہ ایسکس پولیس جلد ہی واقعے میں  ملوث مجرموں کو انصاف کے کٹہرے میں  لائے گی۔

واقعے کے بعد پولیس نے جائے وقوعہ کو سیل کردیا ہے جبکہ واٹرگلیڈ انڈسٹریل پارک  کوبھی بند کردیا گیا ہے۔