برطانوی شاہی خاندان کی جانب سے جاری ہونے والے بیان میں تصدیق کردی گئی ہے کہ شاہی جوڑا پرنس ولیم اور کیٹ مڈلٹن رواں ماہ 14 اکتوبر سے 18 اکتوبر تک پاکستان کا دورہ کریں گے۔

تفصیلات کے مطابق برطانوی شاہی جوڑے کا یہ پہلا باضابطہ سرکاری دورہ پاکستان ہوگا جو پاک برطانیہ تعلقات کو مزید فروغ دے گا، برطانیہ کا شاہی جوڑا لاہور سمیت ملک کے مختلف علاقوں کا دورہ کرے گا۔

شاہی جوڑا پاکستان کے مختلف شعبہ ہائے زندگی سے تعلق رکھنے والے افراد، برطانوی اور پاکستانی عسکری حکام سے ملاقاتیں بھی کرے گا۔

https://twitter.com/KensingtonRoyal/status/1175033903494705152

واضح رہے کہ اس سے قبل شاہی رہائش گاہ کینسنگٹن پیلس کی جانب سے بھی پرنس ولیم اور کیٹ مڈلٹن کے دورہ پاکستان کی تصدیق کی جا چکی ہے۔ اس دورے کی درخواست برطانوی وزارت خارجہ اور دولت مشترکہ کے دفتر کی جانب سے کی گئی تھی۔

کینسنگٹن پیلس کی طرف سے ایک ٹویٹ میں یہ بھی کہا گیا کہ اس دورے سے اندازہ لگایا جا سکتا ہے کہ یہ برطانیہ کی پاکستان میں دوبارہ بڑھتی ہوئی دلچسپی کی علامت ہے۔

لندن میں آغا خان سینٹر کے دورے اور پرنس کریم آغا سے ملاقات کے دوران برطانوی شہزادی جہاں اپنے لباس اور انداز سے توجہ کا مرکز بنی رہیں وہیں لباس کے ساتھ میچنگ ایئر رنگ بے حد پسند کئے گئے جو ایک نامور پاکستانی برینڈ کے ہیں۔

برطانوی شہزادہ پرنس ولیم اور شہزادی کیٹ مڈلٹن 14 سے 18 اکتوبر کے دوران پاکستان کا دورہ کریں گے جو 2006ء کے بعد برطانوی شاہی خاندان کے کسی رکن کا پاکستان کا یہ پہلا دورہ ہوگا۔

2006ء میں شہزادہ چارلس اور کمیلا پارکر نے پاکستان کا دورہ کیا تھا، اس سے پہلے شہزادہ ولیم کی والدہ لیڈی ڈیانا 1996ء میں خیراتی کاموں کے سلسلے میں پاکستان آئی تھیں،ملکہ برطانیہ الزبتھ دوم بھی پاکستان کا دورہ کرچکی ہیں۔

شہزادہ ولیم کا کہنا ہے کہ پاکستان جانے کے لیے بہت پُرجوش ہیں، وہ پاکستان کے خوبصورت مقامات کی سیر کرنا چاہتے ہیں۔