کینیڈا کے عام انتخابات میں وزیراعظم جسٹن ٹروڈو کی جماعت لبرل پارٹی نے نمایاں کامیابی حاصل کرلی۔

کینیڈا میں جنرل الیکشن ہوئے جس میں دو بڑی جماعتوں لبرل پارٹی اور کنزرویٹو کے درمیان کانٹے کا مقابلہ ہوا۔ انتخابی نتائج کے مطابق جسٹن ٹروڈو کی جماعت نے 338میں سے 156 نشستیں جیت لی ہیں جبکہ ان کی حریف کنزویٹیو پارٹی 100 نشستوں کے ساتھ دوسرے نمبر پر ہے۔

جسٹن ٹروڈو نے اعتماد کا مظاہرہ کرنے پر عوام کا شکریہ ادا کرتے ہوئے کہا کہ کینیڈاکےعوام نےترقی پسند ایجنڈے کےحق میں ووٹ دیے۔

اکثریتی حکومت بنانے کے لیے کسی بھی جماعت کو 338 کے ایوان میں 170 نشستیں درکار ہیں۔ اس لیے لبرل پارٹی کو حکومت سازی کے لیے کم نشستیں حاصل کرنے والی دیگر چھوٹی جماعتوں پر انحصار کرنا ہوگا۔

کینیڈا کے الیکشن حکام کے مطابق  2019 کے انتخابات میں ووٹر ٹرن آؤٹ 62 فیصد رہا  جو2015 کے مقابلے میں 6 فیصدکم ہے۔اعدادوشمار کے مطابق 47 لاکھ لوگوں نے اپنا حق رائے دہی استعمال کیا۔

یاد رہے کہ اکتوبر 2015 میں کینیڈا کے پارلیمانی انتخابات میں جسٹن ٹروڈو کی لبرل پارٹی نے حکمران جماعت کنزرویٹو پارٹی کو بھاری اکثریت سے شکست دی تھی۔  لبرل پارٹی نے 338 میں سے 184 جبکہ کنزرویٹو  نے 121 سیٹیں حاصل کی تھیں۔

انتخابات میں  بھاری اکثریت پر امریکی صدر ڈونلڈٹرمپ نے جسٹن ٹروڈو کو مبارکباد پیش کی ہے۔

Congratulations to @JustinTrudeau on a wonderful and hard fought victory. Canada is well served. I look forward to working with you toward the betterment of both of our countries!

— Donald J. Trump (@realDonaldTrump) October 22, 2019

سماجی رابطے کی ویب سائٹ ٹوئٹر پر امریکی صدر ڈونلڈ ٹرمپ نےجسٹن ٹروڈو کو مبارکباد دیتے ہوئے کہا ہے کہ وہ دونوں ممالک کی بہتری کے لیے ٹروڈو کے ساتھ مل کر کام کرنے کے منتظر ہیں۔