ایرانی صدر حسن روحانی نے کہا ہے کہ واشنگٹن کا مقصد صرف اور صرف مسلمانوں کے وسائل اور خطے کا تیل لوٹنا ہے۔

تہران میں 32 ویں بین الاقوامی اسلامی اتحاد کانفرنس کی افتتاحی تقریب کے موقع  پر خطاب کرتے ہوئے ایرانی صدر حسن روحانی کا کہنا تھا کہ امریکہ  اور اسرائیل فلسطین کے مسئلے کوفراموش کرنے کی کوشش کر رہے ہیں۔

ایرانی صدر نے کہا کہ فلسطین کے ساتھ ساتھ قبلہ اول بیت المقدس مسلم دنیا کا سب سے اہم مسئلہ ہے۔

حسن روحانی نے کہا کہ افغانستان،عراق اور یمن میں قتل عام کا ذمہ دار امریکہ  ہے۔ واشنگٹن اور تل ابیب پچھلے تین دہائیوں سے خطے میں تمام جنگوں ، ہلاکتوں اور اختلافات کا ماخذ رہے ہیں۔

انہوں نے کہا کہ امریکہ اور اسرائیل کی ان تمام کوششوں کا مقصد ہمیں  یہ بھلانا ہے کہ گذشتہ برسوں میں مغرب نے امریکہ کی قیادت میں عالم اسلام کے خلاف کیا کیا جرم کیے ہیں۔یہ اس طرح کے  ہتھکنڈے استعمال کرکےاس مسئلے کی اہمیت کو کم کرنا  چاہتا ہے کہ فلسطینی عوام کو اپنے آبائی وطن لوٹنا چاہیئے۔

ایرانی صدر نے مزید کہا کہ دشمنوں نے اس سلسلے میں کچھ کامیابی حاصل کی ہے ، لیکن خوش قسمتی سے اپنے مذموم مقاصد کو حاصل کرنے میں ناکام رہے ہیں۔امریکہ اور اسرائیل مسلم دنیا کی بیداری کی وجہ سے اپنے مذموم مقاصد میں ناکام ہوچکے ہیں۔