عراق کےدارالحکومت بغدادمیں یکےبعددیگرتین دھماکوں کےنتیجےمیں 6افرادجاں بحق  جبکہ 15 افراد زخمی ہوگئےہیں۔

غیرملکی خبررساں ادار ےکےمطابق عراقی دارالحکومت بغدادمیں منگل کی رات تین مختلف مقامات پرتین دھماکے ہوئے۔ جن میں پہلادھماکہ  شمالی بغداد میں الشعب کالونی میں موٹرسائیکل میں نصب بم پھٹنے سے 3 افراد جان کی بازی ہار گئے جبکہ 5 افراد زخمی ہوگئے۔

دوسرا بم دھماکہ  بغداد کے علاقے البیاع میں بھی موٹرسائیکل میں نصب بم پھٹ گیا جس کے نتیجے میں 2 افراد جاں بحق جبکہ 6 افراد زخمی ہوگئے۔تیسرا دھماکہ مشرقی بلدیہ میں ایک دیسی ساختہ بم پھٹنے کے باعث ہوا جس سے ایک شخص جان سے گیا جبکہ 4 افراد زخمی ہوگئے۔

دوسری جانب بغدادمیں ہونےوالے دھماکوں کی ذمہ داری فی الحال کسی گروپ نے قبول نہیں کی۔ تاہم ماضی میں داعش نے بغداد اوردیگر شہروں میں ایسے ہی حملے کیےہیں۔

اس سے قبل گزشتہ ہفتے بغداد میں ہونے والے دھماکے کے نتیجے میں 2 افراد جاں بحق جبکہ 20 افراد زخمی ہوگئے تھے۔

واضح رہے کہ یکم اکتوبر سے عراق میں حکومت کے خلاف مظاہرے بھی جاری ہیں جن میں سیکڑوں افراد ہلاک اور ہزاروں زخمی ہوچکے ہیں۔ گزشتہ دنوں جنوبی شہر بصریٰ اور نصیریہ میں پولیس اور مظاہرین کے درمیان جھڑپوں کے نتیجے میں 6 افراد ہلاک ہوئے تھے، جبکہ عراقی شہر ام قصر میں پولیس کی فائرنگ سے 9 مظاہرین جان کی بازی ہار گئے تھے۔

اس طرح اکتوبر سے جاری مظاہروں میں اموات کی تعداد 340 ہوگئی، اقوام متحدہ نے سنگین صورت حال پر شدید تشویش کا اظہار کرتے فریقین کو معاملہ حل کرنے پر زور دیا ہے۔