یاسین ملک کی اہلیہ مشال ملک نے کہا ہے کہ کشمیر میں ہماری ماؤں، بہنوں اور بیٹیوں کی عزتیں لوٹی جا رہی ہیں عوام حق خودارادیت میں کشمیریوں کا ساتھ دیں۔

تفصیلا ت کے مطابق انسانی حقوق کے عالمی دن سے متعلق یاسین ملک کی اہلیہ مشال ملک نے اپنے ویڈیو پیغام میں قوم سے اپیل کرتے ہوئے کہا ہے کہ چار مہینے سے زائد کا عرصہ ہو چکا ہے کشمیر میں کرفیو ہےکشمیری بھوکے پیاسے تڑپا تڑپا کر شہید کئے جا رہے ہیں۔

مشال ملک نے  یہ بھی کہا  کہ  یاسین ملک کو ڈیتھ سیل میں رکھا گیا ہے،تمام حریت قیادت اس وقت کشمیر میں  نظربند ہے۔

یاسین ملک کی اہلیہ مشال ملک نے  مزید  کہا کہ میں انسانی حقوق کے عالمی دن 10 دسمبر پر تمام قوم سے اپیل کرتی ہوں کہ کشمیر کے لئے باہر نکلیں  کیونکہ   مجھے پاکستانی ماؤں ،بہنو ، بیٹیوں، بھائیوں سب کا ساتھ چاہیے۔

یاد رہے کہ مقبوضہ کشمیر میں بھارتی فوج کا کرفیو اور محاصرہ 127 ویں روز بھی جاری ہے۔

کشمیر میڈیا سروس کے مطابق مقبوضہ کشمیر میں مسلسل127 ویں روز بھی بھارت کے سخت فوجی محاصرے اور انٹرنیٹ کی معطلی کے باعث نظام زندگی بری طرح مفلوج ہے۔

 مقبوضہ وادی میں بھاری تعداد میں بھارتی فوجیوں کی تعیناتی اور دفعہ 144کے تحت پابندیوں کے نفاذ سے کشمیریوں کو شدید مشکلات کاسامنا ہے ۔

مقبوضہ کشمیر میں غاصب بھارتی فوج کشمیریوں کی نسل کشی کر رہی ہے، کشمیری نوجوانوں کو شہید کر کے بھارتی فوج جشن مناتی ہے۔

قابض انتظامیہ کی طرف سے لوگوں کو نماز جمعہ کے بعد بھارت مخالف مظاہروں سے روکنے کے لیےسرینگر سمیت دیگر علاقوں میں سخت پابندیاں دوبارہ نافذ کی گئی ہیں۔

لینڈ لائن ٹیلی فون اور پوسٹ پیڈ موبائل فون کنکشنوں کی جزوی بحالی کے باوجود انٹرنیٹ ، ایس ایم ایس اور پری پیڈ موبائل فون سروسز مسلسل معطل ہیں۔