چین میں کورونا وائرس سےہلاکتوں میں مزید اضافہ ہوگیا، مہلک وائرس سےمزید 64 افراد ہلاک ہوگئے، اب تک چین میں کورونا وائرس سے متاثر ہونے کے بعد ہلاک ہونے والوں کی تعداد 425 ہوگئی۔

چینی حکام کاکہناہے کہ کورونا وائرس کے 2 ہزار 345 نئے کیسز بھی رپورٹ ہوئے ہیں جس کے بعد چین میں وائرس سے متاثرہ افراد کی تعداد 19 ہزار 550 سے بڑھ گئی ہے۔

دوسری جانب امریکا میں بھی کورونا کے گیارہویں کیس کی تصدیق ہو چکی ہے جبکہ بھارتی ریاست کیرالہ میں بھی تیسرا کیس سامنے آگیا تاہم چین سے باہر صرف فلپائن میں ایک شخص کی موت ہوئی ہے۔

خبر ایجنسی کے مطابق 24 ممالک میں اب تک کورونا وائرس رپورٹ ہوچکا ہے۔

گزشتہ روز چینی شہر اورمچی سے نجی ایئر لائن کی پروازسی زیڈ ایک سو پچاس مسافروں کولے کر اسلام آباد پہنچی۔

پاکستان نے چین کے لیے فضائی آپریشن کورونا وائرس کے باعث 29 جنوری سے بند کیا تھا جسے گذشتہ روز بحال کردیا گیا ۔

چین کے شہر اورمچی سے صبح 8 بجکر 30  منٹ پر  آنے والی  پرواز نے اسلام آباد ایئرپورٹ پر لینڈ کیا۔

ذرائع کے مطابق چین سے آنے والے مسافروں کی ایئرپورٹ پر ہی اسکرینک کی جائے گی۔

اس سلسلے میں وزیراعظم کے معاون خصوصی برائے صحت ڈاکٹر ظفرمرزا نے اسلام ایئرپورٹ کا دورہ کیا ، ڈاکٹر ظفر مرزا نے مسافروں کی اسکریننگ کے انتطامات کا جائزہ لیا۔

ائیر پورٹ پر میڈیا سےبات کرتےہوئے ڈاکٹر ظفر مرزا نے کہا کہ  تمام ہوائی اڈوں پر اسکریننگ کے نظام کو مضبوط بنالیا ہے، حکومت پاکستان ہر ممکنہ ہنگامی صورتحال سے نمٹنےکیلئے تیار ہے۔

 ڈاکٹر ظفرمرزانےکہا کہ  قومی ادارہ صحت میں ممکنہ کروناوائرس کیسز کی تشخیص کی سہولت موجود ہے،تمام ہوائی اڈوں پر مسافروں کی اسکریننگ کے جامع انتظامات موجود ہیں۔

گزشتہ روز جوائنٹ سیکرٹری سول ایوی ایشن ڈویژن عبدالستار کھوکھر کا کہنا تھا کہ چین کے لیے پروازیں بحال کرنے کا فیصلہ کرلیا گیا ہے۔

واضح رہے کہ اورمچی کورونا وائرس سے متاثرہ شہر ووہان سے 3 ہزار 300 کلومیٹر شمال جنوب میں واقع ہے۔