کرونا وائرس کے پھیلاؤ کےپیش نظر امریکا میں مجسمہ آزادی اور بھارت میں تاج محمل کو سیاحوں کیلئے مکمل طور پربند کردیا گیا ہے۔

امریکا کے مجسمہ آزادی  کو بھی سیاحوں کیلئے بند کردیا گیا ہے۔ تانبے کا بنا ہوا  مجسمہ آزادی نیو یارک کے جزیرے ایلس کی بندرگاہ پر  1886سے نصب  ہے  جو دنیا بھر میں امریکا کی علامت کے طور پر جانا جاتا ہے۔ کرونا وائرس کے خدشے کے پیش نظرمشہور سیاحتی مقام کو سیاحوں کیلئے بند کر دیا گیا ہے۔

صرف یہ یہی نہیں، بھارت کےسیاحتی مرکز تاج محل کو31 مارچ تک سیاحوں کیلئے بند کردیا گیا۔ جبکہ دیگر سیاحتی مقامات بھی وزیٹرز کیلئے بند ہیں۔

کرونا وائرس کے سبب امریکی ریاست فلوریڈا اور پیرس کے ڈزنی ورلڈ کو بھی 15 مارچ سے عارضی طور پر بند کرنے کا اعلان کیا گیا ہے۔

امریکی دارالحکومت واشنگٹن ڈی سی کی سرکاری عمارتوں میں یکم اپریل تک عوامی داخلے پر پابندی عائد کر دی گئی ہے۔ ان عمارتوں میں ایوانِ نمائندگان اور سینیٹ کی وہ تمام عمارتیں شامل ہیں جہاں پر کانگرس کے ارکان اور ان کا عملہ کام کرتا ہے۔

چین اور نیپال کے درمیان دنیا کی بلند ترین چوٹی ماؤنٹ ایورسٹ کو سیاحوں کیلئے بند کر دیا گیا ہے۔

نیپال اور چین کی حکومتیں کوہ پیماؤں میں مقبول اس عظیم چوٹی پر جانے والے مہم جوؤں کو اپنے اپنے ملکی قوانین کے مطابق اجازت نامے یا پرمٹ جاری کرتی ہیں تاہم چین نے کرونا وائرس کے پھیلاؤ کے پیش نظراس پر پابندی لگا دی ہے۔

کرونا وائرس کے پیش نظرعائد کی جانے والی پابندیوں کے تحت چین نے اپنی جانب سے ماؤنٹ ایورسٹ کے لیے موسم بہار کی مہم جوئی منسوخ کر دی ہے۔