سعودی عرب میں خادم الحرمین الشریفین شاہ سلمان نے  جی 20 ممالک کے  اجلاس  سے خطاب کرتے ہوئے کہا ہے کہ کورونا کی وبا سے نمٹنے کے لیے دنیا کو ہر محاذ پر ٹھوس اقدامات کرنے ہوں گے۔

شاہ سلمان نے دنیا کی بڑی معیشتوں جنھیں جی 20 کے نام سے جانا جاتا ہے کے غیر معمولی اجلاس کی سربراہی کی۔

 شاہ سلمان نے اپنے خطاب میں کہا کہ کورونا عالمی سطح پر معاشی ترقی اور شرحِ نمو کی راہ میں مزاحم ہوگیا ہے۔ ’جی 20 ممالک کی ذمہ داری ہے کہ وہ کورونا کے خلاف برسرِ پیکار ترقی پذیر ممالک کی مدد کریں۔‘

سعودی رہنما نے کہا کہ اشیا اور خدمات میں رکاوٹوں کو فوری طور پر روکنے کی ضرورت ہے اور کورونا کی وبا سے لڑنے کے لیے ایک متحدہ جواب ضروری ہے۔

شاہ سلمان نے کہا ’کورونا کے خلاف جنگ میں ہم عالمی ادارہِ صحت کے شانہ بشانہ ہیں اور اس سلسلے میں ویکسین کی تیاری میں سعودی عرب تعاون کرے گا۔‘

شاہ سلمان کا کہنا تھا کہ کروناوائرس کے متاثرین کی صحتیابی کے لیے تہہ دل سے دعاگو ہیں، وائرس سے عالمی تجارت اور معیشت بھی بری طرح متاثر ہورہی ہے۔

انہوں نے کہا کہ کرونا سے بچاؤ کے لیے سخت اقدامات اٹھانے کی ضرورت ہے، دوست ممالک اور متعلقہ تنظیموں سے مل کر کام کررہے ہیں وبا کا پھیلاؤ روکنے کے لیے کیے جانے والے حفاظتی اقدامات قابل تحسین ہیں۔

شاہ سلمان نے مزید کہا ’موجودہ حالات میں ہمیں مل کر اس کا مقابلہ کرنے کے ساتھ ہی عالمی معیشت کو مستحکم بنانے کے لیے باہمی اعتماد کو قائم رکھتے ہوئے مل کر کام کرنا ہوگا۔

جی 20 کے لیے لازمی ہے کہ عالمی معیشت کو مستحکم بنانے کے لیے مشترکہ طور پرقوی اور مضبوط لائحہ عمل مرتب کر کے کام کا آغاز کیا جائے تاکہ عالمی معیشت کے استحکام کےلیے اعتماد کی فضا بحال ہو۔

اجلاس میں جی 20 ممالک کے سربراہان کے علاوہ عالمی ادارہ برائے صحت، اقوام متحدہ اور ورلڈ بینک کے نمائندے بھی شریک ہیں۔

جی 20 ممالک کے آن لائن اجلاس سے پہلے سعودی فرمانروا نے اپنی ایک ٹویٹ میں کہا تھا کہ جی 20 ممالک کا اجلاس کورونا وائرس کی وبا سے نمٹنے کے لیے کی جانے والی عالمی کوششوں کو متحد کرے گا۔

As the world confronts the COVID-19 pandemic and the challenges to healthcare systems and the global economy, we convene this extraordinary G20 summit to unite efforts towards a global response.
May God spare humanity from all harm.

— سلمان بن عبدالعزيز (@KingSalman) March 25, 2020

شاہ سلمان نے یہ بھی لکھا کہ ‘خدا انسانیت کو ہر طرح کے نقصان سے بچائے۔’

جی 20 ممالک کا اجلاس یوں تو سال میں ایک مرتبہ منعقد ہوتا ہے لیکن سنہ 2009 اور 2010 میں عالمی معاشی بحران کے دوران اس کے دو اجلاس منعقد ہوئے تھے۔

جی 20 کا سالانہ اجلاس سعودی عرب کے دارالحکومت ریاض میں نومبر میں منعقد ہوگا لیکن کورونا وائرس کے باعث پیدا ہونے والے بحران سے نمٹنے کے لیے ہنگامی اجلاس آج جمعرات کو بلایا گیا۔