سعودی عرب میں سورج گرہن لگنے کے ساتھ ہی مکہ مکرمہ میں بیت اللّٰہ میں نمازِ کسوف ادا کی گئی۔

تفصیلات کے مطابق سعودی عرب میں سورج گرہن کے موقع پر بیت اللّٰہ، مسجدِ نبوی ﷺ اور مملکت کے تمام شہروں کی مساجد میں نمازِکسوف کی ادائیگی کی گئی۔

نمازکسوف کا طریقہ عام نفلوں کی طرح دو رکعت نماز جس میں قرأت ، رکوع اور سجدے قدرے لمبے ہوتے ہیں۔

سورج گرہن کے ختم ہونے تک قبلہ رخ ہو کر دعا ، ذکر اور استغفار میں مصروف رہنا بہت افضل ہے۔

نمازِ کسوف کی ادائیگی کے دوران بیت اللّٰہ، مسجد نبوی ﷺ اور دیگر مساجد میں کورونا ایس او پیز کا خاص خیال رکھا گیا۔

لوگوں نے اس موقع پر اپنے رب کے حضور گڑ گڑا کر معافی مانگی اور توبہ و استغفار کی۔

واضح رہے کہ آج 21 جون بروز اتوارسورج گرہن سعودی عرب کے علاوہ پاکستان سمیت افریقہ اور ایشیاء کے کئی ممالک میں دیکھا گیا۔

پاکستان کے شہر سکھر میں سورج گرہن سے رِنگ آف فائر یا روشنی کے چھلے کا دلکش نظارہ دیکھنے کو ملا، جس کی وجہ سے سکھر میں دن میں مغرب کے وقت جیسا منظر نظر آیا۔

کراچی میں سورج گرہن کا نکتۂ عروج گزر گیا، جہاں جزوی سورج گرہن ہوا جس سے سارے شہر میں سایہ چھایا رہا، تاہم رِنگ آف فائر نہیں دکھائی دیا۔

پاکستان میں آج صبح 9 بج کر 26 منٹ پر سورج کو گرہن لگنا شروع ہوا تھا ، اس وقت اپنے اختتام کی جانب گامزن ہے جو دوپہر 2 بج کر 34 منٹ پر ختم ہوگا۔