کورونا کا دنیا  بھر میں پھیلاؤ جاری ہے جس کے زیر اثر ایک روز میں کیسز کا نیا ریکارڈ قائم ہوگیا ہے۔

تفصیلات کے مطابق عالمی ادارہ صحت کے مطابق   گزشتہ چوبیس گھنٹوں تین لاکھ سات ہزار سے زائد کیسز رپورٹ ہوئے ہیں جبکہ اس سے قبل تین لاکھ سے زائد کیسز چھ ستمبر کو رپورٹ ہوئے تھے۔

اس ضمن میں عالمی وبائی مانیٹرنگ بورڈ نے خبردار کیا ہے کہ دنیا ایک اور متوقع وبا کے لیے بالکل تیار نہیں ہے، کوررونا کی وباء میں اقوام عالم کا غیرمحتاط ردعمل کا نتیجہ خوفناک ثابت ہوا ہے۔

کورونا کے کیسز میں اضافے کے بعد انڈونیشیا کے دارالحکومت  جکارتہ میں ایک بار پھر لاک ڈاؤن لگا دیا گیا ہے۔

یاد رہے کہ کورونا نے بھارتی پارلیمنٹ کو بھی اپنی لپیٹ میں لے لیا ہے تیس ارکان  اور پچاس  ملازمین کا کورونا ٹیسٹ مثبت  آگیا جس کے بعد انہیں چودہ دن کے لیے قرطینہ کردیا گیا ہے۔

خیال رہے کہ بھارت میں مریضوں کی تعداداننچاس لاکھ اور ہلاکتیں اسی ہزار کا ہندسہ عبور کر گئیں۔

دنیا بھر میں کورونا وائرس سے متاثرہ لوگوں کی تعداد دوکروڑ بانوے لاکھ سے تجاوز کرگئی ہے اور اس وائرس سے اب تک نو لاکھ 29ہزار سے زائد افراد ہلاک ہوئے ہیں۔

امریکہ اس وائرس سے سب سے زیادہ متاثر ہوا ہے جہاں کورونا کے کیسز کی تعداد 67لاکھ سے زائد ہے جبکہ ایک لاکھ 98ہزار 533افراد اس وائرس سے ہلاک ہوئے ہیں۔

دوسرے نمبر پر بھارت ہے جہاں کورونا کے مصدقہ مریضوں کی تعداد 48لاکھ سے زائد ہے اور 79 ہزار 784افراد ہلاک ہوئے ہیں۔
اس وائرس سے دوکروڑ دس لاکھ سے زائد افراد صحتیاب ہوئے ہیں۔

ادھر عالمی ادارہ صحت نے کہا ہے کہ دنیا بھر میں ایک دن میں کوروناوائرس کے تین لاکھ سات ہزار نوسو تیس نئے کیسز کی اطلاعات ملی ہیں جو ایک ریکارڈ ہے۔