یوکرائن نے روس کو حملہ آور ہونے سے باز رکھنے کی خاطر نیٹو رکن ممالک سے مدد کی پُر زور اپیل کردی۔

یوکرائنی وزیر خارجہ دیمیترو کولیبا نے آج نیٹو ممالک کے سفارت کاروں سے ملاقات کی جس میں انہوں نے کہا کہ روس ان کی سرحدوں پر فوج تعینات کر رہا ہے۔ انہوں نے اپیل کی کہ روسی مداخلت کو روکنے کے لیے پابندیوں کا ایک پیکج تیار کرنا چاہیے۔

لیٹویا کے دارالحکومت ریگا میں ہونے والی نیٹو رکن ممالک کے وزرائے خارجہ کی میٹنگ میں یوکرائنی وزیر خارجہ دیمیترو کولیبا نے تین نکاتی منصوبہ بھی پیش کیا جس کے مطابق روس کے ساتھ رابطے کی خاطر ایک واضح چینل بنایا جائے، روس پر پابندیوں کا ایک مسودہ ترتیب دیا جائے اور یوکرائنی دارالحکومت کیف کی عسکری مدد میں اضافہ کیا جائے۔

یوکرائنی وزیر خارجہ نے مزید کہا کہ اگر منظم منصوبہ بندی کی جائے تو روسی صدر ولادیمیر پیوٹن کو سنگین قدم اٹھانے سے روکا جا سکتا ہے۔ سابق سوویت ریاست یوکرائن یورپی یونین اور نیٹو میں شمولیت کی خواہاں ہے۔

اس موقع پر نیٹو اتحاد کے چیف ژینس شٹولٹن برگ نے خبردار کیا کہ اگر روس نے یوکرائن میں عسکری کارروائی کی تو ماسکو حکومت کو بھاری قیمت چکانا پڑے گی۔ انہوں نے مزید کہا کہ اس صورتحال میں نیٹو رکن ممالک روس پر پابندیاں بھی عائد کر سکتے ہیں۔ واضح رہے کہ نیٹو اتحاد پابندیوں کی سفارش اور مسودہ تیار کرنے کا مجاز ہے۔

ادھر روسی صدر ولادیمیر پیوٹن کا کہنا ہے کہ یوکرائن اور نیٹو ممالک کی فوجی مشقوں اور صف آرائیوں سے روسی سلامتی کو شدید خطرات لاحق ہیں۔ پیوٹن نے واضح کیا کہ اگر امریکا اور نیٹو نے یوکرائن میں میزائل سسٹم نصب کیا تو روس جوابی کارروائی پر مجبور ہوگا۔