برطانیہ اور کینیڈا نے اپنے عوام سے اومیکرون کے پھیلاؤ کو روکنے کے لیے حفاظتی تدابیر اختیار کرنے کی ہدایت کی ہے۔

برطانوی چیف میڈیکل افسر کرس وٹی نے آج اراکین پارلیمنٹ کو ایک آن لائن سوال جواب سیشن کے دوران بتایا کہ ابھی تک اِس بات کی تصدیق نہیں کی جا سکی آیا اومیکرون تباہ کن ہے یا نہیں لیکن اومیکرون کیسز میں اضافے کو مدنظر رکھتے ہوئے برطانوی عوام کو کرسمس سیزن کے حوالے سے اپنے طور پر احتیاطی تدابیر کا انتخاب کرنا ہوگا۔

برطانوی شاہی خاندان اومیکرون ویریئنٹ کے پھیلاؤ کی وجہ سے پہلے ہی کرسمس سے قبل منعقد کیے جانے والے روایتی ظہرانے کی تقریب منسوخ کرنے کا اعلان کرچکا ہے۔

وزیراعظم بورس جانسن نے افواہوں کی پُرزور تردید کرتے ہوئے کہا کہ وہ برطانیہ میں خاموشی سے لاک ڈاؤن نافذ نہیں کریں گے۔

رواں ہفتے برطانیہ میں اومیکرون ویریئنٹ سے متاثرہ مریضوں میں ریکارڈ اضافے کے بعد وزیراعظم بورس جانسن نے کورونا ویکسین کی تیسری خوراک یا بوسٹر شاٹ لگوانے کی مہم شروع کی تھی۔

اُدھر کینیڈا میں آج حکومت کی جانب سے کہا گیا ہے کہ تیزی سے پھیلتے اومیکرون ویریئنٹ کے باعث صوبوں میں ویکسینیشن کے عمل کی رفتار بڑھائی جا رہی ہے جس کے لیے ضروری ہے کہ عوام سفر سے گریز کریں۔

کینیڈین وزیر صحت یان ویس ڈوکلوس نے آج ایک پریس کانفرنس میں کہا کہ وہ واضح طور پر کہنا چاہتے ہیں کہ یہ وقت سفر کرنے کا نہیں ہے۔ کینیڈا میں سماجی رابطے اومیکرون کے پھیلاؤ کا باعث بن رہے ہیں۔

کینیڈا کے وزیراعظم جسٹن ٹروڈو نے بھی عوام پر زور دیا ہے کہ وہ احتیاطی تدابیر پر عمل کریں، کرسمس اور نئے سال کی تقریبات کے دوران انتہائی احتیاط برتیں اور بچوں کو ویکسین لگوائیں۔

کینیڈا میں اکتوبر سے کورونا کیسز کی تعداد میں پھر اضافہ دیکھنے میں آرہا ہے۔ ایک ہفتے کے دوران نئے کیسز کی اوسط تعداد بلند ترین سطح پر پہنچ چکی ہے۔