امریکی صدر نے فوج کو ہائی الرٹ رہنے کی ہدایت کردی ہے۔

غیر ملکی خبر رساں ادارے کے مطابق امریکی سیکرٹری دفاع لائٹ آسٹن کا کہنا ہے کہ امریکی صدر کی ہدایت پرفوج کوہائی الرٹ پر رکھا ہے، صورت حال کشیدہ ہوئی تو8500 امریکی اہلکار یورپ بھیجیں گے۔

سیکریڑی دفاع کے مطابق امریکی فوجیوں کومشرقی یورپ میں تعیناتی کے لیے الرٹ کردیا ہے۔

رپورٹ کے مطابق ترجمان پینٹاگون کا کہنا ہے کہ روس کی یوکرائن اوربیلاروس کی سرحد پرنقل وحرکت تشویش کاباعث ہے تاہم ابھی فوجیوں کویورپ بھیجنے کا حتمی فیصلہ نہیں کیا گیا۔

ترجمان پینٹاگون کے مطابق نیٹواتحادیوں کی مشاورت سے فوج کو یورپ بھیجا جائے گا۔ پینٹاگون نے روس کو خبر دار کرتے ہوئے کہا کہ کشیدگی میں کمی کے کوئی آثار دکھائی نہیں دے رہے جبکہ روس کی جانب سے یوکرائن سرحد پر فوجیوں کو جمع کرنا جاری رکھا ہوا ہے۔

واضح رہے کہ یوکرائن تنازعے کو لے کر روس اور امریکا کے کے درمیان شروع ہونے والی لفظی جنگ اب عملی اقدامات میں بدلنے لگی ہے۔

میڈیا رپورٹس کے مطابق امریکا نے روس کے خلاف مہلک ہتھیاروں کی 90 ٹن وزنی کھیپ یوکرائن پہنچادی ہے جس کے بعد خطے میں جنگ کے بادل منڈلانے لگے ہیں۔

یہ بھی پڑھیں: یوکرائن تنازع؛ برطانیہ فضول باتیں پھیلانا بند کرے، روس

یاد رہے کہ روس بارہا یہ باور کراچکا ہے اس کا یوکرائن پر حملے کا کوئی ارادہ نہیں ہے تاہم وہ اپنے دفاع کے لئے ہر ممکن اقدامات کرے گا۔