یوکرائن نے جرمنی کی جانب سے ہتھیاروں کی فروخت سے انکار کیے جانے پر مایوسی کا اظہار کیا ہے۔

یوکرائنی وزیر خارجہ دیمترو کولیبا نے اپنے ایک بیان میں برلن انتظامیہ کی جانب سے خطے کی موجودہ صورتحال کے باوجود یوکرائن کو دفاعی سازوسامان فراہم کرنے سے انکار پر تنقید کرتے ہوئے کہا کہ جرمنی نے ہمیں مایوس کیا ہے۔

یوکرائن کے وزیر خارجہ دیمترو کولیبا نے کہا کہ وہ 2014ء سے اب تک جرمنی کی جانب سے یوکرائن کی حمایت اور روس اور یوکرائن کے درمیان مسلح تنازع کے معاملے میں اس کے سفارتی اقدامات کے شکر گزار ہیں تاہم جرمنی کے موجودہ بیانات مایوس کن ہیں جو ہماری حمایت و تعاون کے برخلاف ہیں۔

یوکرائن کے وزیر خارجہ دیمترو کولیبا کا  کہنا ہے کہ جرمنی کی طرف سے ان کے ملک کو ہتھیار فروخت کرنے سے انکار مایوسی کا سبب بنا ہے۔

وزیر خارجہ دیمترو کولیبا کا کہنا ہے کہ روس کے خلاف مغرب کا اتحاد پہلے سے کہیں زیادہ اہم ہے۔ کولیبا نے کہا کہ ہم روس پر قابو پانے کے لیے بھرپور کوششیں صرف کر رہے ہیں، جرمن شراکت داروں کو ایسے الفاظ اور اقدامات سے اس اتحاد کو نقصان پہنچانے اور روسی صدر ولادیمیر پیوٹن کی یوکرائن پر کسی  نئے حملے کے لیے حوصلہ افزائی کرنے سے گریز کرنا چاہیے۔

واضح رہے کہ جرمن چانسلر اولاف شولز اور وزیر خارجہ اینالینا بیئربوک نے گزشتہ دنوں یوکرائن کو ہتھیار فروخت کرنے سے انکار کر دیا تھا۔