بھارتی ریاست کرناٹک میں تعلیمی اداروں میں حجاب پر پابندی  کی درخواست پر  سماعت کل تک لیے ملتوی ہوگئی۔

بھارتی میڈیا کے مطابق   کرناٹک ہائی کورٹ  میں تعلیمی اداروں میں حجاب پر پابندی کے خلاف درخواستوں کی سماعت کل 17 فروری کو دوبارہ شروع ہوگی۔

درخواست گزار کا حجاب پر پابندی سے متعلق دوران سماعت عدالت میں کہنا تھا کہ  تعلیمی اداروں میں  حجاب پابندی کا حکم غیر منصفانہ ہے۔

درخواست گزار نے کہا کہ مسلم طالبات سے کہا جا رہا ہے کہ وہ اپنے ایمان اور تعلیم میں سے کسی ایک کا انتخاب کریں، اس سے بنیادی حقوق کی خلاف ورزی ہوتی ہے۔

انہوں نے مزید کہا کہ تعلیمی ایکٹ کا مقصد ہم آہنگی کو فروغ دینا ہے نہ کہ طلباء میں اختلاف پیدا کرنا۔

مزید پڑھیے: بھارت میں مسلمان شخص نے ہندو لڑکی کو بچانے کیلئے ٹرین کے نیچے چھلانگ لگادی

واضح رہے کہ بھارتی ریاست کرناٹک کے کئی کالجز میں مسلمان طالبات کے حجاب کرنے پر پابندی عائد کردی گئی ہے۔

حجاب پر پابندی  کے خلاف ایک مسلمان طالبہ نے  یکم فروری کو عدالت سے رجوع کیا تھا۔ پابندی کے خلاف مسلمان طالبہ نے کرناٹک  ہائیکورٹ میں درخواست دائرکی تھی۔

طالبہ نے درخواست میں موقف اختیارکیا  ہے کہ حجاب کرنا طالبات کے بنیادی انسانی حقوق میں شامل ہے جس کی ضمانت بھارتی آئین میں دی گئی ہے۔

دیگر طالبات کا بھی اس حوالے سے کہنا ہے کہ کالج کے اصول و ضوابط میں حجاب پر پابندی سے متعلق کچھ نہیں لکھا، حجاب کرنا ان کا مذہبی حق ہے جس سے اُنہیں زبردستی روکنے کی کوشش کی جا رہی ہے۔