عرب ممالک میں سعودی عرب سونے کے ذخائر رکھنے والے ممالک میں سرفہرست ہے جبکہ امریکہ دنیا میں سب سے زیادہ سونا رکھنے والا ملک ہے۔

خبر رساں ادارے کے مطابق ورلڈ گولڈ کونسل نے سونے کے ذخائر رکھنے والے ممالک کی فہرست جاری کی ہے جس کے مطابق سعودی عرب سونے کے ذخائر رکھنے والے ممالک میں دنیا کا 18 واں ملک ہے جبکہ عرب ممالک میں سرفہرست ہے۔

عرب دنیا میں سعودی عرب کے بعد لبنان کا دوسرا، الجزائر کا تیسرا، لیبیا کا چوتھا، عراق پانچواں، مصر چھٹا، کویت ساتواں، قطر کا آٹھواں، متحدہ عرب امارات کا نواں، اردن کا دسواں، شام کا گیارہواں، مراکش بارہواں، تیونس تیرہواں، بحرین چودھواں اور پندرھویں نمبر پر یمن موجود ہے۔

رپورٹ کے مطابق سعودی عرب کے پاس اس وقت 323.1 ٹن سونے کے محفوظ ذخائر موجود ہیں جبکہ لبنان کے پاس  286.8 ٹن، الجزائر کے پاس 173.6 ٹن، لیبیا کے پاس 116.6 ٹن، عراق کے پاس 96.4 ٹن، مصر 80.8 ٹن، کویت 79 ٹن اور قطر کے پاس 56.7 ٹن سونے کے ذخائر موجود ہیں۔

علاوہ ازیں متحدہ عرب امارات کے پاس 55.9 ٹن، اردن کے پاس 43.5 ٹن، شام 25.80 ٹن، مراکش 22.1 ٹن، تیونس 6.8 ٹن، بحرین 4.7 ٹن اور یمن کے پاس 1.6 ٹن سونے کے ذخائر موجود ہیں۔

اسی طرح دنیا میں سب سے زیادہ سونے کے ذخائر اس وقت امریکہ کے پاس موجود ہیں جس کے پاس 8133.5 ٹن سونا موجود ہے جبکہ دنیا میں دوسرے نمبر پر سب سے زیادہ سونا جرمنی کے پاس 3359.1 ٹن موجود ہے۔

عالمی دنیا میں سونے کے ذخائر رکھنے والے ممالک میں تیسرا نمبر اٹلی کا ہے جس کے پاس 2451.8 ٹن سونا موجود ہے جبکہ چوتھا نمبر فرانس کا جس کے پاس 2436.4 ٹن اور پانچواں نمبر روس کا جس کے پاس 2298.5 ٹن سونا موجود ہے۔