کینیڈا کے وزیر اعظم جسٹن ٹروڈو عالمی وبا کورونا وائرس کا شکار ہوگئے ہیں۔

کینیڈین وزیر اعظم جسٹن ٹروڈو نے سماجی رابطے کی مائیکرو بلاگنگ ویب سائٹ ٹوئٹر پر ٹوئٹ کرتے ہوئے کورونا وائرس میں مبتلا ہونے کی تصدیق کی ہے جبکہ ان کے 2 بچوں کا بھی کورونا ٹیسٹ مثبت آیا ہے۔

ان کا کہنا تھا کہ کورونا ٹیسٹ مثبت آگیا ہے جبکہ وہ بہتر محسوس کررہے ہیں اور پبلک ہیلتھ گائیڈنس پر عمل کرتے ہوئے وہ اپنا کام گھر سے جاری رکھیں گے۔

انہوں نے سب کو ہدایت کی کہ وہ مہلک وائرس سے بچاؤ کی ویکسین لگوائیں اور بوسٹر ڈوز بھی لازمی لگوائیں۔

واضح رہے کہ کینیڈین وزیر اعظم نے گذشتہ دنوں کورونا سے متاثرہ شخص سے رابطے میں آنے کے بعد خود کو قرنطینہ کرلیا تھا جبکہ وہ کورونا سے بچاؤ کی ویکسین اور بوسٹر ڈوز بھی لگواچکے ہیں۔

خیال رہے کہ کینیڈا میں اب تک 30 لاکھ سے زائد کورونا وائرس کے کیسز رپورٹ ہوچکے ہیں جبکہ 33 ہزار 870 افراد اس مہلک وائرس سے ہلاک ہوچکے ہیں۔

دوسری جانب کینیڈا میں اب تک 28 لاکھ 11 ہزار 924 مریض کورونا وائرس کو شکست دے چکے ہیں جبکہ کینیڈا میں فعال کی تعداد 2 لاکھ 9 ہزار 147 ہے جس میں سے 1 ہزار 211 مریضوں کی حالت انتہائی تشویش ناک ہے۔

یہ بھی پڑھیں: اسلامو فوبیا کسی بھی قیمت پر قابل قبول نہیں ہے، جسٹن ٹروڈو

یاد رہے کہ کینیڈا میں سال 2022 کے آغاز سے ہی ملک بھر میں کورونا کیسز کی تعداد میں اضافہ ریکارڈ کیا جارہا ہے جبکہ یومیہ کیسز بھی بلند ترین سطح پر پہنچ گئے ہیں۔