افغانستان میں زلزلے کے بعد شروع ہونے والا ریسکیو آپریشن روک دیا گیا۔

افغان ڈیزاسٹر مینجمنٹ اتھارٹی کے ترجمان نے خبر ایجنسی سے گفتگو کرتے ہوئے کہا کہ افغانستان میں زلزلے سے ایک ہزار سے زائد افراد جاں بحق ہوئے ہیں۔

افغانستان کی وزارت ڈیزاسٹر مینجمنٹ کے ترجمان محمد نسیم حقانی نے بتایا کہ پاکستان کی سرحد کے ساتھ پکتیکا کے صوبے میں 2000 افراد زخمی ہوئے ہیں اور دس ہزار گھر مکمل طور پر تباہ ہو چکے ہیں۔

افغانستان کی وزارت ڈیزاسٹر مینجمنٹ کے ترجمان محمد نسیم حقانی کا کہنا تھا کہ ہم نے سرچ آپریشن روک دیا ہے، زلزلے سے بچ جانے والے شہریوں کو ادویات اور دیگر ضروری امداد کی فوری ضرورت ہے۔

یہ بھی پڑھیں:  افغانستان میں خوفناک زلزلے نے تباہی مچا دی، ہلاکتوں کی تعداد ایک ہزار سے تجاوز کرگئی

واضح رہے کہ کابل سمیت افغانستان کے مختلف حصوں میں بدھ کی رات گئے 6.1 شدت کا زلزلہ آیا تھا، ننگرہار، لغمان، غزنی، میدان وردک، لوگر اور خوست کے صوبوں میں بھی زلزلے کے جھٹکے محسوس کیے گئے۔

اس زلزلے کے شدید جھٹکے ہمسایہ ملک پاکستان کے دارالحکومت اسلام آباد، صوبہ پنجاب اور خیبرپختونخوا کے صوبائی دارالحکومت پشاور سمیت شمالی علاقوں میں بھی محسوس کیے گئے۔ پاکستان کے زلزلہ پیما مرکز کے مطابق زلزلے کی شدت 5.9 اور گہرائی 40 کلومیٹر تھی جب کہ زلزلے کا مرکز وسطی افغانستان تھا۔

پاکستان میں بھی چند روز کے دوران یہ دوسرا زلزلہ ہے۔ اس سے قبل جمعہ کے روز بھی وفاقی دارالحکومت اسلام آباد سمیت ملک کے مختلف شہروں میں 5.1 شدت کا زلزلہ آیا تھا۔