روسی حکام نے دعویٰ کیا ہے کہ اُن کی مسلح افواج نے مشرقی یوکرین میں امریکا کے فراہم کردہ دو جدید ہیمارس راکٹ سسٹم اور ان کے گولہ بارود کے ڈپو تباہ کر دیے ہیں جبکہ یوکرین نے اس دعوے کو جعلی قرار دیا ہے۔

روس کی وزارتِ دفاع نے گزشتہ روز ایک بیان میں کہا کہ اس کی فوج نے یوکرین کے امریکی ساختہ ہائی موبیلیٹی آرٹلری راکٹ سسٹمز (ہیمارس) کے دو لانچر تباہ کر دیے ہیں۔ یہ جدید ترین نظام امریکا نے یوکرین کو حال ہی میں فراہم کیے تھے۔ کرماٹورسک کے جنوب میں واقع ایک گاؤں میں جنگی محاذ کے قریب ہیمارس کے لیے راکٹ ذخیرہ کرنے والے گولہ بارود کے دو ڈپو بھی تباہ کر دیے گئے ہیں۔

روسی وزارتِ دفاع نے ایک وڈیو فوٹیج بھی جاری کی ہے جس میں ہیمارس اور اسلحہ ڈپو کو تباہ کرنے کے لیے کیا جانے والا حملہ دکھایا گیا ہے۔ گزشتہ اتوار کو لوہانسک پر قبضے کے بعد یہ اسلحہ ڈپو روسی افواج کا ہدف تھے۔

دوسری جانب یوکرین کے جنرل اسٹاف نے روس کے اس دعوے کو مسترد کرتے ہوئے اسے جعلی قرار دیا ہے۔ ٹوئٹر پر ایک پوسٹ میں کہا گیا ہے کہ روس کے دعوے جعلی ہیں اور یوکرین روسی افواج پر تباہ کن حملوں کے لیے امریکا کی جانب سے فراہم کردہ ہیمارس کا استعمال کر رہا ہے۔

یورپی کونسل برائے خارجہ تعلقات کی ایک رپورٹ کے مطابق یوکرین کو جولائی کے اوائل تک صرف چار ہیمارس نظام ملے تھے جبکہ امریکا نے جولائی کے وسط تک یوکرین کو آٹھ ہیمارس مہیا کرنے کا وعدہ کیا ہے۔