بھارتی دارالحکومت دہلی میں واقع تہاڑ جیل میں حریت رہنما یاسین ملک نے 12 روز بعد بھوک ہڑتال ختم کر دی۔

یاسین ملک کی اہلیہ مشعال ملک نے ٹوئٹر پر جاری اپنے بیان میں کہا ہے کہ مجھے خوشی ہے کہ میرے شوہر، عظیم کشمیری حریت رہنما محمد یاسین ملک نے 12 دن کے بعد تہاڑ جیل میں بھوک ہڑتال ختم کر دی ہے۔

https://twitter.com/MushaalMullick/status/1554198122477326338?ref_src=twsrc%5Etfw%7Ctwcamp%5Etweetembed%7Ctwterm%5E1554198122477326338%7Ctwgr%5E8d8f6247f2fbf096ea8eb2a4fcd110169954d78a%7Ctwcon%5Es1_&ref_url=https%3A%2F%2Fjang.com.pk%2Fnews%2F1119024

حریت رہنما یاسین ملک کی اہلیہ مشعال ملک نے تمام لوگوں کا آواز اٹھانے اور دعا کرنے پر شکریہ ادا کیا۔

یاد رہے کہ یاسین ملک نے 22 جولائی کو روبیہ سعید کے اغوا کے جھوٹے مقدمے کی منصفانہ سماعت اور انہیں ذاتی طورپر جموں کی عدالت میں پیش ہونے کے حق سے محروم رکھے جانے کے خلاف غیر معینہ مدت کیلئے بھوک ہڑتال شروع کی تھی۔

گزشتہ دنوں بھوک ہڑتال کے باعث طبیعت ناساز ہونے پر انہیں جیل سے اسپتال منتقل کیا گیا تھا۔

یاسین ملک کو بلڈ پریشر میں اتار چڑھائو کے بعد نئی دلی کے آر ایم ایل ہسپتال میں داخل کرایا گیا تھا اور جیل واپس آنے کے بعد انہوں نے دوبارہ کچھ بھی کھانے سے انکار کر دیا تھا۔

جیل حکام نے اس حوالے سے بتایا کہ دلی کے امور جیل خانہ جات کے ڈائریکٹر جنرل سندیپ گوئل کی درخواست پریاسین ملک نے اپنی بھوک ہڑتال دو ماہ کے لیے موخر کر دی ہے۔