عالمی برادری کی توجہ ریاستی دہشت گردی کی جانب سے مبذول کروانے کے لیے مقبوضہ کشمیر میں پوسٹر چسپاں کردیے گئے ہیں۔

کشمیر میڈیا سروس کی رپورٹ کے مطابق بھارت کے غیر قانونی طور پر زیرِ قبضہ جموں وکشمیر میں 10 دسمبر کومنائے جانے والے انسانی حقوق کے عالمی دن کے موقع پر سری نگر اوردیگر علاقوں میں پوسٹر چسپاں کیے گئے ہیں۔

رپورٹ کے مطابق پوسٹرز میں عالمی برادری کی توجہ مقبوضہ علاقے میں بھارت کی بڑھتی ہوئی ریاستی دہشت گردی کی جانب مبذول کرائی گئی ہے۔

رپورٹ میں کہا گیا ہے کہ یہ پوسٹرز جموں وکشمیر صدائے مظلوم ، جموں وکشمیر جسٹس اینڈ پیس انیشی ایٹو سمیت دیگر متعدد گروپوں کی جانب سے لگائے گئے ہیں۔

ان پوسٹروں میں مقبوضہ علاقے میں بھارتی فوجیوں کی طرف سے بڑے پیمانے پر جاری انسانی حقوق کی سنگین پامالیوں کو اجاگر کیا گیا ہے۔

پوسٹرز پر درج تحریریوں میں کہا گیا ہے کہ کشمیری عوام کو ان کے حق خودارادیت سمیت تمام بنیادی حقوق سے محروم کردیا گیا ہے۔

پوسٹرز میں افسوس کا اظہار کرتے ہوئے کہا گیا ہے کہ بھارتی فوجی محاصرے اور تلاشی کی نام نہاد کارروائیوں اور جعلی مقابلوں میں بے گناہ کشمیریوں بالخصوص نوجوانوں کو قتل کر رہے ہیں اور ان کی میتوں کو تدفین کے لیے ورثا کے حوالے بھی نہیں کیا جاتا۔

علاوہ ازیں انسانی حقوق کی بین الاقوامی تنظیموں پر زور دیا گیا ہے کہ وہ مقبوضہ کشمیر میں بھارتی ریاستی دہشت گردی کاسخت نوٹس لیں اور تنازعہ کشمیر کو اقوام متحدہ کی قراردادوں اور کشمیری عوام کی امنگوں کے مطابق حل کرانے کیلئے اپنا کردار ادا کریں۔

واضح رہے کہ ہر سال 10 دسمبر کو دنیا بھر میں انسانی حقوق کا عالمی دن منایا جاتا ہے جب کہ اس دن اقوام متحدہ کی جنرل اسمبلی نے 1948 میں انسانی حقوق کا عالمی اعلامیہ منظور کیا تھا۔