چین میں بارشوں کا 140 سالہ ریکارڈ ٹوٹ گیا ہے جس کے نتیجے میں 34 افراد ہلاک اور 27 لاپتہ ہیں۔

غیر ملکی خبر رساں ایجنسی کی رپورٹ کے مطابق چین میں سمندری طوفان کے زیر اثر بارشوں نے تباہی مچادی ہے جب کہ سڑکیں دریاؤں میں تبدیل ہوگئی ہیں۔

رپورٹ کے مطابق حالیہ بارشوں کے باعث بیجنگ کے ہوائی اڈوں پر سیکڑوں پروازیں منسوخ اور تاخیر کا شکار ہیں۔

رپورٹ میں کہا گیا ہے کہ شدید بارشوں کی وجہ سے مختلف حادثات میں 20 افراد ہلاک اور 27 افراد لاپتہ ہیں۔ طوفانی بارشوں سے دارالحکومت بیجنگ، تیانجن اور ہیبائی کے کئی علاقے سب سے زیادہ متاثر ہوئے ہیں۔

میٹرولوجیکل سروس کے مطابق بیجنگ میں 744.8 ملی میٹر بارش ریکارڈ کی گئی جب کہ 40 گھنٹے کی مسلسل بارش نے 140 سالہ ریکارڈ توڑ دیا ہے۔

چین کے میٹرولوجیکل سروس کا کہنا ہے کہ بیجنگ میں فوجی ہیلی کاپٹر سیلاب متاثرین تک امداد پہنچانے میں مصروف ہیں۔

اس سے قبل چین میں 1891 میں سب سے زیادہ 609 ملی میٹر بارش ریکارڈ کی گئی تھی۔

واضح رہے کہ ٹائفون ڈوکسوری ایک سابقہ سپر ٹائفون ہے جو فلپائن سے ٹکرانے کے بعد گزشتہ ہفتے چین کے جنوبی صوبہ فوجیان سے ٹکرایا تھا اور اب چین کے اوپر سے شمال کی طرف بڑھ رہا ہے۔

محکمہ موسمیات کے مطابق صرف 40 گھنٹوں میں ریکارڈ کی گئی بارش جولائی کے پورے مہینے کی اوسط بارش کے قریب ہے۔

اس حوالے سے سرکاری میڈیا نے گزشتہ ہفتے خبردار کیا تھا کہ شمالی چین میں شدید بارشوں سے 130 ملین افراد کے متاثر ہونے کا خدشہ ہے جب کہ بیجنگ کے مضافاتی علاقے سمیت آس پاس کے علاقے بارشوں سے بری طرح متاثر ہوسکتے ہیں۔

سرکاری میڈیا کے مطابق دارالحکومت اور پڑوسی صوبے ہیبی سے 974,400 افراد کو محفوظ مقامات پر منتقل کردیا گیا تھا۔

سرکاری خبر رساں ایجنسی کا ایک رپورٹ میں کہنا ہے کہ بارش میں نرمی کے بعد اب توجہ امدادی کارروائیوں پر مرکوز ہوگئی ہے، سینکڑوں چینی ریڈ کراس ریسکیورز کو سخت متاثرہ علاقوں میں ملبہ صاف کرنے اور متاثرین کو نکالنے کے لیے بھیجا گیا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں