کینیڈین وزیر اعظم جسٹن ٹروڈو نے سکھ رہنما کے قتل میں بھارت کے ملوث ہونے کا شبہ ظاہر کیا ہے۔

بین الاقوامی خبرر ساں ادارے کے مطابق کینیڈا میں سکھ رہنما ہردیپ سنگھ کے قتل کے حوالے  سے کینیڈین وزیراعظم جسٹن ٹروڈو  نے پارلیمنٹ سے خطاب میں کہا کہ بھارتی وزیر اعظم مودی سے حالیہ ملاقات میں براہ راست معاملہ اٹھایا ہے ۔

جسٹن ٹروڈو نے کہا کہ کینیڈین شہری کے قتل میں کسی دوسری حکومت کا ملوث ہونا ہماری خودمختاری کی خلاف ورزی ہے جس کی اجازت نہیں دی جاسکتی۔

یاد رہے کہ جون 2023 میں خالصتانی رہنما ہردیپ سنگھ کو کینیڈا کے صوبے برٹش کولمبیا میں ایک بازار میں قتل کر دیا گیا تھا۔

گزشتہ ہفتے جی 20 سربراہی اجلاس میں شرکت کے لیے کینیڈا کے وزیر اعظم جسٹن ٹروڈو  بھارت آئے تھے جہاں  نریندر مودی کینیڈا میں سکھ علیحدگی پسندوں کی بڑھتی مقبولیت اور بھارتی سفارتکاروں کے خلاف تشدد کو ہوا دینے جیسے واقعات پر ان سے نالاں نظر آئے۔

درحقیقت سکھ علیحدگی پسند تحریک کی وجہ سے  بھارت اور کینیڈا کے مابین تعلقات خراب رہے ہیں۔

اس واقعے کے بعد  بھارت نے اپنے ملک میں تعینات کینیڈا کے سفیر کو طلب کر کے اُن کے ملک میں خالصتان کے حامی افراد اور تنظیموں کی سرگرمیوں پر شدید اعتراض کیا تھا۔

خالصتان کے حامیوں نے ہردیپ سنگھ کے قتل کے خلاف ٹورنٹو، لندن، میلبرن اور سان فرانسسکو سمیت دنیا کے کئی شہروں میں مظاہرے کیے تھے۔

ہردیپ سنگھ سے پہلے پرمجیت سنگھ پنجواڑ کو مئی 2023 میں پاکستان کے شہر لاہور میں قتل کر دیا گیا تھا۔

جون 2023 میں برطانیہ میں مقیم خالصتان لبریشن فورس کے سربراہ اوتار سنگھ کھنڈا کی پراسرار حالات میں موت ہو گئی تھی۔

بھارت میں سکھوں کی آبادی دو فیصد ہے اور کچھ سکھ علیحدگی پسند سکھوں کے لیے ایک علیحدہ ملک ’خالصتان‘ بنانے کا مطالبہ کرتے آئے ہیں۔

بھارت کا الزام ہے کہ ٹروڈو حکومت کینیڈا میں سرگرم سکھ علیحدگی پسندوں کے خلاف کریک ڈاؤن کرنے میں ناکام رہی ہے۔

کینیڈا میں خالصتان کی حامی تحریک اتنی زور و شور سے چل رہی ہے کہ سکھوں کے لیے الگ ملک خالصتان کے حوالے سے ریفرنڈم بھی کرایا جا چکا ہے۔

جسٹن ٹروڈو نے کہا کہ کینیڈا ہمیشہ آزادی اظہار اور پُرامن مظاہروں کا تحفظ کرے گا۔

جسٹن ٹروڈو نے کہا کہ ان معاملات کو ہوا دے کر  بھارت کینیڈا کی ملکی سیاست میں مداخلت کا مرتکب ہو رہا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں