اسرائیل نے غزہ کے سیکڑوں مقامات پر بمباری کرکے 100 سے زائد فلسطینیوں کو شہید کردیا۔

غیر ملکی خبر رساں ادارے کے مطابق اسرائیل نے غزہ کے سیکڑوں مکانات کو بمباری سے نشانہ بنایا جس کے نتیجے میں 100 سے زائد فلسطینی شہید ہوگئے۔

رپورٹ کے مطابق صیہونی فوج نے گذشتہ 24 گھنٹوں کے دوران رفح کراسنگ اور جبالیہ کیمپ اور خان یونس میں فضائی حملے کیے۔

رپورٹ میں کہا گیا ہے کہ شمالی غزہ میں اسرائیل کی مسلسل بمباری اور پابندیوں کی وجہ سے تمام اسپتال غیر فعال ہوگئے ہیں۔

دوسری جانب غزہ میں فلاحی امداد کی فراہمی کے لیے اقوام متحدہ کی سلامتی کونسل میں قرارداد کو منظور کرلیا گیا ہے تاہم قرارداد میں فوری جنگ بندی کی بات نہیں کی گئی۔

سلامتی کونسل میں منظور کی گئی قرارداد میں غزہ میں کشیدگی ختم  کرنے کے لیے پائیدارحالات کے قیام کی بات کی گئی ہے۔

قرارداد میں کہا گیا ہے کہ غزہ میں ضرورت کے مطابق فلاحی امداد کی فراہمی کو یقینی بنایا جائے۔ سلامتی کونسل کے 13 ارکان نے قرارداد کے حق میں ووٹ دیا جب کہ روس اور امریکا نے ووٹ نہیں ڈالا۔

واضح رہے کہ 7 اکتوبر سے جاری اسرائیلی حملوں میں اب تک 20 ہزار سے زائد فلسطینی شہید اور 52 ہزار 586 زخمی ہوگئے ہیں جن میں بچے اور خواتین بھی شامل ہیں۔