بھارتی فوج کی حراست میں 4 کشمیریوں کی ہلاکت پر پونچھ کمیونٹی نے برہنہ احتجاجی پریس کانفرنس کی۔

مقبوضہ جموں و کشمیر میں تعینات مودی سرکار کے وردی پوش غنڈوں نے بھارت کا اصلی سفاک چہرہ پوری دنیا کے سامنے بے نقاب کردیا ہے۔

صوبہ جموں کے بفلیاز سرنکوٹ پونچھ میں 4 معصوم شہریوں کے وحشیانہ حراستی قتل پر پونچھ کمیونٹی نے برہنہ احتجاجی پریس کانفرنس کی۔

مسلمان سماجی کارکن کی سربراہی میں دیگر ہندو، سکھ اور عیسائی سماجی کارکنان نے دورانِ کانفرنس بے گناہ شہریوں کے قتل میں ملوث بھارتی فوج کے قاتلوں کی نشاندہی کی۔

پریس کانفرنس میں معصوم شہریوں کے قاتلوں کے خلاف ایف آئی آر درج کرنے کا جموں وکشمیر انتظامیہ سے مطالبہ کیا گیا ہے۔

پونچھ کمیونٹی کارکن نے پریس کانفرنس میں کہا ’’بھارتی فوج کے معصوم کشمیری نوجوانوں پر تھرڈ ڈگری ٹارچر کی ویڈیو وائرل ہوگئی اور جب مودی سرکار معاملہ دبا نہ سکی تو نامعلوم افراد کے نام پر ایف آئی آر درج کردی‘‘۔

انہوں نے کہا ’’ہمارا مطالبہ ہے کہ ایف آئی آر میں نشاندہی کیے جانے والے افراد غلام مصطفیٰ، محمد رفیق، ارشاد اور جگی کے خلاف ایف آئی آر درج کی جائے‘‘۔

دورانِ کانفرنس کمیونٹی ممبران نے یہ انکشاف کیا کہ مقتولین کے ورثاء کو ایف آئی آر درج کروانے اور ظلم کے خلاف آواز اٹھانے سے روکنے کے لئے سنگین دھمکیاں دی جارہی ہیں۔

پریس کانفرنس میں وزیر دفاع راج ناتھ، ایس ایس پی پونچھ اور جموں وکشمیر انتظامیہ سے مجرمان کے خلاف منصفانہ انکوائری کا پر زور مطالبہ بھی کیا گیا ہے۔

علاوہ ازیں جموں کشمیر انتظامیہ کی جانب سے مطالبات تسلیم نہ کرنے کی صورت میں پونچھ کمیونٹی نے برہنہ احتجاج کو جاری رکھنے کے عزم کا اعادہ کیا ہے۔

پونچھ کمیونٹی کے کارکن کہتے ہیں کہ ہندو، مسلم، سکھ اور عیسائی اتحاد کے تحت ہم سب منصفانہ انکوائری اور انصاف کا مطالبہ کرتے ہیں، انصاف نہ ملنے کی صورت میں ہم برہنہ احتجاج جاری رکھیں گے جب کہ پونچھ کمیونٹی نے ایف آئی آر درج کرنے کے لیے 7 روز کا الٹی میٹم بھی دے دیا۔