القسام بریگیڈ کے ترجمان، ابو عبیدہ نے کہا ہے کہ ان کی تنظیم غزہ جنگ بندی معاہدے کا احترام کرنے کے لیے پُرعزم ہے اور ثالث سے مطالبہ کیا ہے کہ وہ اسرائیل کو بھی اس معاہدے کی پاسداری پر مجبور کرے۔

انہوں نے واضح کیا کہ جنگ بندی معاہدے کی کامیابی کا انحصار اسرائیل کے عمل پر ہوگا اور اسرائیل کی کسی بھی خلاف ورزی سے پورا عمل خطرے میں پڑ سکتا ہے۔

ترجمان نے مزید کہا کہ “طوفان الاقصیٰ معرکہ آرائی” کو 471 دن مکمل ہو چکے ہیں، جس نے قابض حکومت کے تابوت میں آخری کیل ٹھونک دی ہے۔ ابو عبیدہ نے کہا کہ ہماری قوم کی قربانیاں اور بہایا گیا خون کبھی رائیگاں نہیں جائے گا۔

ابو عبیدہ نے اسرائیل کے غزہ میں کیے گئے مظالم کی شدید مذمت کرتے ہوئے کہا کہ مجاہدین نے ہر محاذ پر صیہونی فوج کو کاری ضرب لگائی اور قابض ریاست کو عالمی قوتوں سے مدد لینے پر مجبور کر دیا۔

انہوں نے مزید کہا کہ دنیا کو یہ پیغام دیا جا چکا ہے کہ قابض حکومت ایک بڑا دھوکہ ہے۔

ترجمان کے مطابق، مزاحمتی دھڑوں نے غزہ کے ہر کونے میں دشمن سے جنگ لڑی اور آخری لمحے تک بے مثال دلیری اور شجاعت کا مظاہرہ کیا۔ انہوں نے اعتراف کیا کہ یہ ایک غیر متوازن جنگ تھی اور ہمیں انتہائی ناممکن حالات کا سامنا تھا، مگر مجاہدین نے اپنے حوصلے بلند رکھے

ابو عبیدہ نے مزید کہا کہ القسام بریگیڈ اور دیگر مزاحمتی گروہوں کی جدوجہد نے قابض حکومت کے دعوؤں کو جھوٹا ثابت کیا اور دنیا بھر میں فلسطینیوں کے کاز کو مزید تقویت دی۔