فلسطینی صدر محمود عباس کی جانب سے اسرائیلی یرغمالیوں کی رہائی کے مطالبے پر مزاحمتی تنظیم حماس کا سخت ردعمل سامنے آگیا۔

حماس کے رہنما باسم نعیم نے صدر محمود عباس کے بیان کو “توہین آمیز اور مشکوک” قرار دیتے ہوئے کہا کہ وہ بار بار اسرائیلی جرائم کا الزام فلسطینی عوام اور مزاحمتی تنظیموں پر ڈال رہے ہیں۔

باسم نعیم کا مزید کہنا تھا کہ صدر عباس اسرائیلی مظالم کی بجائے اپنی ہی قوم کو موردِ الزام ٹھہرا رہے ہیں، جو ناقابلِ قبول ہے، ایسے بیانات اسرائیلی بیانیے کو تقویت دیتے ہیں اور فلسطینی اتحاد کو کمزور کرتے ہیں۔

فلسطینی صدر کا حماس سے مطالبہ

قبل ازیں فلسطینی صدر محمود عباس نے حماس سے مطالبہ کیا تھا کہ وہ اسرائیلی یرغمالیوں کو فوری طور پر رہا کرے، تاکہ اسرائیل کو غزہ پر حملوں کا جواز نہ ملے، ان کے مطابق، یرغمالیوں کی عدم رہائی سے فلسطینی عوام روزانہ قیمت چکا رہے ہیں۔

فلسطینی صدر کا کہنا تھا کہ یرغمالیوں کی عدم رہائی نہ صرف اسرائیلی جارحیت کو ہوا دے رہی ہے بلکہ فلسطینی عوام کی مشکلات میں بھی اضافے کا باعث بن رہی ہے، ہمیں روز لاشیں اٹھانا پڑ رہی ہیں، ہمارے لوگ مارے جا رہے ہیں، حماس کو چاہیے کہ یرغمالیوں کو رہا کرے تاکہ ہمیں اس عذاب سے نجات ملے۔

غزہ میں انسانی بحران جاری

حالیہ اسرائیلی حملوں میں صرف بدھ کے روز 25 فلسطینی شہید ہوئے، جن میں 11 افراد وہ تھے جو ایک اسکول میں پناہ لیے ہوئے تھے اور اسے بمباری کا نشانہ بنایا گیا۔

فلسطینی وزارت صحت کے مطابق 7 اکتوبر 2023 سے اب تک 51 ہزار 305 فلسطینی شہید ہو چکے ہیں۔