امریکہ نے پاک بھارت کشیدگی پر اپنے دوٹوک مؤقف میں کہا ہے کہ ایسی جنگ میں مداخلت نہیں کریں گے جس سے ہمارا کوئی لینا دینا نہ ہو۔

امریکی نائب صدر جے ڈی وینس نے فاکس نیوز کو دیے گئے ایک انٹرویو میں کہا ہے کہ امریکہ پاکستان اور بھارت کے درمیان کشیدگی میں کمی کے لیے سفارتی ذرائع سے کام کر رہا ہے، تاہم اس تنازع میں براہِ راست مداخلت کا ارادہ نہیں رکھتا۔

انہوں نے کہا کہ پاک بھارت تنازع سے امریکہ کا کوئی براہِ راست تعلق نہیں ہے اور ہم ایسی کسی جنگ میں شامل نہیں ہوں گے جس کا ہم سے کوئی واسطہ نہ ہو۔

ان کا کہنا تھا کہ امریکہ دونوں ممالک کو صرف یہی مشورہ دے سکتا ہے کہ وہ تحمل اور سفارتکاری سے کام لیں، مگر انہیں زبردستی جنگ روکنے پر مجبور نہیں کیا جا سکتا۔

نائب صدر جے ڈی وینس نے اس امید کا اظہار کیا کہ موجودہ صورتحال کسی بڑی علاقائی جنگ میں نہیں بدلے گی، ایٹمی قوتوں کے درمیان تصادم ہمیشہ تشویشناک ہوتا ہے اور ہمیں اس پر گہری تشویش ہے۔

انہوں نے انکشاف کیا کہ حالیہ جھڑپ میں بھارت نے پہل کی اور پاکستان نے اس کا جواب دیا، ایسے نازک حالات میں دونوں ممالک کو ٹھنڈے دماغ سے سوچنا چاہیے، تنازع کا جلد از جلد پرامن حل ضروری ہے۔

جے ڈی وینس نے اس بات پر زور دیا کہ امریکہ خطے میں امن و استحکام کے لیے سفارتی کوششیں جاری رکھے گا، تاہم وہ ایسی جنگ میں حصہ نہیں لے گا جو اس کی قومی سلامتی سے براہ راست متعلق نہ ہو۔