ایک حالیہ تحقیق کے مطابق عالمی وبا کورونا وائرس کرنسی نوٹ اور موبائل فون کی اسکرین پر 28 دن تک فعال رہ سکتا ہے ، جس سے یہ بات سامنے آئی کہ یہ وائرس موبائل فون اور کرنسی نوٹس کے ذریعے بھی پھیل سکتا ہے۔

 ایک مائیکرو بیالوجسٹ چارلس گربا کا کہنا ہے کہ موبائل فون کوکورونا وائرس سے بچانے کیلئے ضروری ہے کہ اسے وقتاً فوقتاً صاف کیا جائے، اسے صاف کرنے کیلئے 60 فیصد پانی اور 40 فیصد ”ربنگ الکوحل“ ملاکر محلول بنالیں ۔

اس محلول کو مائیکروفائبر سے بنے کپڑے پر لگا کر اس سے موبائل فون کی اسکرین کو صاف کریں ، اس سے جراثیم سے موبائل فون محفوظ رہے گا ۔

 موبائل فون کی اسکرین پر ”اسکرین پروٹیکٹر“ لگوا لیں۔

اس اسکرین پروٹیکٹر کو باقاعدگی سے جراثیم کش محلول سے صاف کرلیا جائے تو موبائل کی اصل اسکرین کو کوئی نقصان نہیں پہنچتا اور وہ جراثیم سے محفوظ رہتی ہے۔

ماہرین کا مشورہ یہ ہے کہ ان دنوں کرنسی نوٹس کی جگہ اگر ڈیبٹ یا کریڈٹ کارڈز کے ذریعے رقم کی ادائیگی کی جائے تو زیادہ مناسب رہے گا کیونکہ پلاسٹک کے کارڈز کو سینیٹائزر سے صاف کیا جا سکتا ہے اور انہیں کوئی نقصان بھی نہیں ہوگا۔

یہ بھی حقیقت ہے کہ اگر کرنسی نوٹس کو عام سینیٹائزر سے صاف کرلیا جائے تو وہ خراب ہوسکتے ہیں اور پھر وہ استعمال کے قابل نہیں بچیں گے ۔

کرنسی نوٹوں کو صاف کرنے کیلئے مارکیٹ میں ’’الٹرا وائلٹ لائٹ سینیٹائزرمتعارف کروائے گئے ہیں ، جن کی مدد سے کرنسی نوٹ کو جراثیم سے محفوظ بنایا جاسکتا ہے، اسی سینیٹائزر سے موبائل فون کو بھی صاف رکھا جاسکتا ہے ، یہ دونوں چیزوں کیلئے ہی کارآمد ہے ۔

جب بھی موبائل فون یا کرنسی نوٹس کو جراثیم سے محفوظ رکھنے کیلئے صاف کرنے بیٹھیں تو ہاتھوں میں دستانے پہنیں ۔